कवर्धा। जिला के ग्राम पंचायत कांपा म भ्रस्टाचार उजागर करइया युवक ल डिफाल्टर घोसित करे गिस हे। एकर बर सरपंच, सचिव अऊ 7 पंच मन मिलके बकायदा प्रस्ताव घलो पारित करिन। युवक ह बताइस कि ओहर गांव म होत सरकारी कामकाज म गड़बड़ी के सिकायत जिला प्रसासन ले करे रहिस, जउन ह जांच म सही पाए गिस। संग ही ओहर मूलभूत सुविधा बर रासि के खर्च म गड़बड़़ी अऊ पशु शेड निर्मान के घलो सिकायत करे रहिस। ये सब कार्रवाई ले पंचायत के प्रतिनिधी मन ल लगिस कि एकर ले ओमनके छवि ल नुकसान होत हे। एकर बर ओमन युवक के खिलाफ ही नियम बिरूद्ध प्रस्ताव पारित कर दिन। फेर युवक राजाराम के कहना हे कि चाहे कछु भी होजाए ओहर अन्याय के खिलाफ लड़ई लड़त रही। ये मामला म जिला पंचायत के सीईओ ह कहिस कि अइसन प्रस्ताव पारित करे के कउनो कानून नइ हे, अऊ न ही ग्राम पंचायत ल अधिकार हे। मामला के जांच करके उचित कार्रवाई करे जाही।