ब्यूटी क्वीन संग शादी करे बर छोड़ दिस राजगद्दी, लेकिन सालभर बाद होगे तलाक, मलेशिया के पूर्व राजा के रोचक दास्तान
मॉस्को/कुआलालंपुर। 51 साल के मलेशिया के पूर्व राजा सुल्तान मोहम्मद-वी हा अपन ले 23 साल छोटे रूसी ब्यूटी क्वीन संग शादी करे बर अपन राजगद्दी ला छोड़ दे रिहिस। अब शादी के एके साल बाद ही उंकर तलाक होगे।
स्थानीय मीडिया के मुताबिक, सुल्तान हा पिछले साल मॉस्को म ओक्साना वीवोदीना (27) संग शादी करे रिहिस। शादी के बाद ओक्साना हा इस्लाम धर्म अपनाईस अउ अपन नाम रिहाना ओक्साना पेट्रा रख लिस।
ओक्साना हा मई महीना म बेटा ला जनम दिस, जेकर नाम इस्माइल लायन हे। बच्चा के जनम के कुछ हफ्ता बाद ही उंकर तलाक के कॉपी सामने आईस त लोग अवाक रह गें। दूनों झन तलाक बर सिंगापुर म रजिस्टर कराए रिहिन। ये प्रक्रिया 22 जून ले 1 जुलाई तक चलिस। अब दूनों अलग-अलग रइथें।
सुल्तान मोहम्मद-वी के गद्दी छोड़े के बाद मलेशिया म पहंग स्टेट के सुल्तान अब्दुल्ला सुल्तान अहमद शाह ला नया किंग बनाए गे रिहिस। अब्दुल्ला सुल्तान हा सुल्तान मोहम्मद पंचम के जगह ले हें। 1957 म ब्रिटेन ले आजादी मिले के बाद रोटेशन प्रणाली के हिसाब ले अब्दुल्ला देश के 16वां राजा बने रिहिस।
मोहम्मद पंचम हा 2016 म मलेशिया के गद्दी संभाले रिहिस। ओक्साना वोवोदीना ले उंकर शादी मॉस्को के एक उपनगरीय इलाका बारविखा म होए रिहिस। ओक्साना हा 2015 म मिस मॉस्को रहि चुके। एकर बाद ओ हा चीन-थाईलैंड म मॉडलिंग घलो करिस। इही दौरान ओकर अफेयर सुल्तान के साथ शुरू होय रिहिस।
