कोरबा के छात्रा ह बनाइस इको फ्रेंडली सेनेटरी पैड

जापान म प्रेजेंट करही अपन इन्वेंशन ल

कोरबाः जिला के एक होनहार छात्रा ह केला के छिलका के इस्तेमाल कर सेनेटरी
पेड बनाए के कारनामा कर दिखाइस हे. छात्रा रीना अब जापान म अपन नवाचार
(इनोवेशन) के प्रदर्शन करही. कोरबा के एक सरकारी स्कूल के छात्रा रीना के
चयन सकूरा एक्सचेंज प्रोग्राम बर होइस.

वो ह जापान म एक जापानी परिवार के संग पांच दिन रही. उहें वैज्ञानिक मन, विद्यार्थी मन अउ शिक्षाविदा मन ले अपन विचार साझा करही. उहां के सोध-अनुसंधान अउ सिक्षा प्रनाली के बारे म
जानही. सिक्षा विभाग के अनुसार उंखर मॉडल के प्रस्तुति उंखर करियर म
मददगार साबित होही..

बॉलीवुड के मूवी पेडमैन ल पूरा दुनिया ह देखिस हे अउ एखर सराहना घलो करिस.  लेकिन फिल्म के करीब तीन साल पहिली ही कोरबा के स्याहीमुडी म रहइया
छात्रा रीना राजपूत ह अपन आविष्कार ल सुरू कर देय रहिस हे. ए बेरा म रीना
कक्षा 9वीं म पढ़त रहिस हे.

विज्ञान म रूचि रखइया रीना ह जब देखिस के केले के पत्ता पानी ल सोखत हे. तो ओखर जिज्ञासा होइस के, एखर हमन का उपयोग कर सकत हन. रीना के जिज्ञासा ल देखके उंखर के स्कूल के प्राचार्या फराहाना अली ओखर मार्गदर्सक बनगे अउ प्राचार्या के मदद ले उमन इको फ्रेंडली सेनेटरी पेड के निरमन करिस.

अब अपन इहीं खोज ल लेके इन्सपायर अवार्ड मानक योजना म 11वीं के छात्रा
रीना राजपूत ह आईआईटी दिल्ली म आयोजित 7वीं राष्ट्रीय विज्ञान प्रदर्सनी
म सामिल होइस. ए योजना के उददेश्य विज्ञान अउ तकनीक के प्रयोग कर सामाजिक
विकास के क्षेत्र म समस्या मन के समाधान करइया नवाचारी प्रोजेक्ट तइयार
करे म विद्यार्थी मन ल प्रोत्साहित करना हे.

इहां रीना ह अपन प्राचार्य हाई स्कूल स्याहीमुड़ी डॉ. फरहाना अली के मार्गदर्सन म अपन प्रोजेक्ट इको फ्रेंडली सेनेटरी नैपकिन का प्रेजेंटेसन दिस. इहां ले चयनित होए के बाद अब प्रोजेक्ट का प्रदर्सन करे बर रीना जापान जावत हे.