कुरुक्षेत्र नाम हे करन खान के अवैयया फिलिम के, कोरोना संकट के बाद होही शूटिंग, अभी चलत हे रीडिंग
जय जोहार…. सांई कृष्णा फिल्म प्रोडक्शन के अवैयया छत्तीसगढ़ी फिलिम आय कुरुक्षेत्र, जमा मुख्य भूमिका म हे करन खान अऊ पूजा साहू, इंखर आलावा एमा एक्शन स्टार दिलेश साहू अऊ ज्योत्सना ताम्रकार घलो अभिनय म नजर आही,
करन खान ह जानकारी देत हुए किहिस कि अभी कहानी के रीडिंग के काम चलत हे अऊ कोरोना संकट के बाद एखर शूटिंग करे जाही, फिलिम के निर्देशक आय उदय कृष्णा जी हे, बता दन कि ये पहली बार होही जब एक मंजे हुए कलाकार के साथ दिलेश का काम करे के मउका मिलही।
करन ह किहिस कि में हमेशा कहानी ल पढ़ पढ़ के खूब मेहनत करे के कोशिश करथंव, ताकि हर बार ले कुछ हट के अभिनय कर पाओं, ओमन ह मंदरा जी के मिसाल दिस अऊ किहिस कि ओमा में ह तीन शेड म अभिनय करे हंव जेन ह मोर बर एक चेलेंज रिहिस ,
दिलेश साहू ल ले के करन ह किहिस कि लव दीवाना म दिलेश के अभिनय काबिले तारीफ़ रिहिस अऊ ओखर एक्शन तो लाजवाब रिहिस। ओखर संग काम करे म मोला अऊ भी कुछ सीखे ल मिलही, फिलिम के मुख्य सहायक निर्देशक हे कौशल उपाध्याय।
