मजदूर मन ल लेके काली लखनऊ ले रायपुर पहुंचही श्रमिक स्पेशल ट्रेन
जय जोहार…. मुख्यमंत्री भूपेश बघेल के पहल म आन राज्य म फंसे छत्तीसगढ़ के श्रमिक अऊ मजदूर मन ल लाय के सिलसिला ह सुरू हो गे हे। ए कड़ी म उत्तरप्रदेश के लखनऊ ले छत्तीसगढ़ के श्रमिक मन ल लेके आज श्रमिक स्पेशल ट्रेन ह रवाना होवत हे। जेन 13 मई के दोपहर एक बजे रायपुर पहुंच सकत हे। ए ट्रेन ह बिलासपुर म घलो बिहिनिया 10.30 बजे रूकही।
कलेक्टर डॉ. एस भारतीदासन ह बताइस कि एखर अलावा रायपुर रेलवे स्टेशन म लखनऊ ले 15 अऊ 17 मई के एक-एक ट्रेन अऊ 16 मई के बिहार के मुजफ्फरपुर ले एक ट्रेन आय के संभावना हे। ए ट्रेन के बिहनिया 9 बजे रायपुर पहुंचे के संभावना हे।
कलेक्टर रायपुर ह श्रमिक मन के आय के बेरा म सुविधा के चिन्हांकन अऊ संयुक्त सर्वेक्षण के दृष्टि ले तीन अधिकारी के टीम गठित करे हे। एमा क्षेत्रीय परिवहन अधिकारी शैलाभ साहू, सीएसपी डीसी पटेल अऊ तहसीलदार अमित बेक सामिल हे। ए श्रमिक मन के रायपुर आगमन म सोसल डिस्टेंसिंग के पालन करत हुए दू-दू बोगी ले मजदूर मन ल उतारे जाही। इहां मेडिकल टीम के तरफ ल ओखर स्वास्थ्य जांच करे जाही। एखर बाद ए मजदूर मन ल विशेष बस ले ओखर जिला के क्वारेंटाइन सेंटर म भेजे जाही।
