Corona: क्वारेंटाइन सेन्टर ले भागे मजदूर ह निकले हे कोरोना पाजिटिव
जय जोहार…. नारायणपुर के क्वारेंटाइन सेन्टर ले भागे एक मजदूर म कोरोना (corona) पाजिटिव के पहचान होय हे। जेखर बाद विभाग म हड़कंप मच गे हे।
जानकारी के मुताबिक दूसर प्रदेश ले आय मजदूर मन ल सरकार के तरफ ले बनाय गे क्वारेंटाइन सेन्टर म रखे गे रिहिस, लेकिन तीन दिन पहिले वो मजदूर ह क्वारेंटाइन सेन्टर ले अचानक भाग गे रिहिस। एति स्वास्थ्य विभाग ह एहतियातन मजदूर के पहिले ही सैम्पल ले रखे रिहिस।
जगदलपुर मेडिकल कॉलेज ले शुक्रवार के रिपोर्ट आय हे, जेमा मजदूर के रिपार्ट ह कोरोना (corona) पाजिटिव मिले हे।
स्वास्थ्य विभाग ह ओला अस्पताल म भर्ती कराय बर संपर्क करिन, त मजदूर के पता नई चले ले विभाग म हड़कंप मच गिस।
जानकारी के मुताबिक तीन दिन पहिले ही मजदूर ह क्वारेंटाइन सेन्टर ले भाग गे रिहिस। कोरोना (corona) पाजिटिव रिपोर्ट आय के बाद मजदूर के तलाशी म स्वास्थ्य विभाग के टीम ह ओखर घर पहुंचिस, त मजदूर ह मिल गिस।
अब स्वास्थ्य विभाग ह मजदूर ल अस्पताल म भर्ती कराय के संगेसंग पुरा परिवार के सैम्पलिंग करत हे। ऊहचे जेन एरिया म मजदूर मिले हे, ओला कन्टेनमेंट जोन बनाय गे हे।
