लखपति दीदी पहल: विश्रामपुरी के बिहान ले कोंडागांव के विश्रामपुरी के इश्वरी बनिस लखपति दीदी

रायपुर। प्रधानमंत्री नरेन्द्र मोदी के नेतृत्व म महिला मन के आर्थिक सशक्तिकरण ल लेके शुरू करे गिस लखपति दीदी पहल ग्रामीण महिला मन ल आत्मनिर्भर बनाए के एक उल्लेखनीय माध्यम बनत हे। ए पहल ले राष्ट्रीय ग्रामीण आजीविका मिशन (एनआरएलएम) के तहत महिला मन ल आजीविका गतिविधी ले जोड़के ओमन ल  आत्मनिर्भर बनाए बर अउ उखर वार्षिक आय ल एक लाख रुपया ले ज्यादा तक पहुंचाए के उद्देश्य ले शुरू करे गे रीहीस। ए पहल ह देशभर म हजारों महिला मन के जिनगी ल बदलिस हे, उही म ले एक हे कोंडागांव जिला के विश्रामपुरी के इश्वरी मरकाम।

    कोण्डागांव जिले के विश्रामपुरी के इश्वरी मरकाम आज बिहान ले जुड़के अन्य ग्रामीण महिला मन बर एक मिसाल बनगे हे। इश्वरी 2017 म समूह ले जुड़िन हे अउ आजीविका के छोटे-छोटे गतिविधी करके आज अपन परिवार के आर्थिक स्थिति स सुदृढ़ करिस हे। इश्वरी अपन पति अउ दु झिन लईका संग एकठन छोटे परिवार म रहिथे। ओखर पति कृषि कार्य करत हैं, लेकिन परिवार के जरूरत अउ लइका मन के पढ़ाई के खर्चा पूरा करे म कठिनाइ के सामना करे बर पड़त रीहिन। ए कठिन परिस्थिति ले उबरे बर इश्वरी ह महिला स्व-सहायता समूह के सहारा लिस अउ अपन जीनगी ल बदले के ठानिस। इश्वरी ओ दिन ल याद करत बताईन की ओ बेर बड़ मुश्किल ले हमर घर चलत रीहिन, परिवार के जरूरत ल पूरा करे बर, हमन कई महीना ले पइसा इक्कठ करतेन, तब जाके हमर छोटे-छोटे जरूरत ल पूरा कर पात रेहेन। इश्वरी ह बताइन कि बिहान ले जुड़े के बाद मोर अन्दर एक आत्मविश्वास जागिस, अउ आज में अपन बात सबके बीच रख पात हों।

    समूह ले जुड़े के बाद इश्वरी ह सीआईएफ के राशि के उपयोग करके विभिन्न आजीविका गतिविधी के शुरुआत करिन। ओमन ह कृषि कार्य, फैंसी दुकान संचालन अउ स्कूल म मध्यान्ह भोजन बनाए के कार्य करत हे। एखर अलावा वो बीसी सखी के रूप म घलो सेवा प्रदान करत हे।

   इश्वरी आज अपन मेहनत अउ लगन ले अलग-अलग स्रोत ले एक लाख रुपया ले अधिक वार्षिक आय अर्जित करत हे। इश्वरी ला कृषि कार्य ले 35 हजार रुपया, फैंसी दुकान ले 60 हजार अउ मध्यान्ह भोजन योजना ले 24 हजार रुपया तक के आमदनी होवत हे। संग म ओला छत्तीसगढ़ शासन के महतारी वंदन योजना ले घलो हर महीना एक हजार रूपया प्राप्त होवत हे। आज ए जम्मों आय स्रोत ले ओखर आर्थिक स्थिति पहली ले कहीं बेहतर होगे हे। अब ओखर लइका मन के पढ़ाई म घलो आर्थिक तंगी नई आत हे अउ परिवार के जीवन स्तर पहली ले  बेहतर होगे हे।

    इश्वरी मरकाम के सफलता महिला सशक्तिकरण के दिशा म एक बड़का कदम हे। ओखर सफलता ए साबित करत हे कि जब महिला मन ल सही अवसर अउ संसाधन मिलत हे, त वो अपन जीवन ल आत्मनिर्भरता अउ सफलता की ओर ले जा सकत हें।
इश्वरी कहिथे कि, “बिहान योजना ह मोला अउ मोर जइसन कतको महिला मन ल आत्मनिर्भर बनाए के अवसर देवत हे। अब मे अपन परिवार के जरूरत ल पूरा करे म सक्षम हो अउ मोर लइका मन के पढ़ाई म कोनो भी प्रकार के बाधा नई हे।” ओ ह प्रधानमंत्री नरेन्द्र मोदी अउ मुख्यमंत्री विष्णुदेव साय ल ए पहल बर धन्यवाद दिस,  जेन ग्रामीण महिला मन के जीवन ल सशक्त अउ समृद्ध बनात हे।