आरटीई के तहत आवेदन भरे के आखिरी तारीख ह काली, पालक संघ ह करिन भर्ती प्रक्रिया ल स्थगित करे के मांग

जय जोहार…. राज्य म आरटीई के तहत आवेदन ल भरे के आखिरी तिथि ह काली हे। एखर पहिली पालक संघ ह भर्ती प्रक्रिया ल स्थगित करे के मांग करे हे।
रायपुर लोक शिक्षण संचालनालय ह गत दिन जारी पत्र म केहे हे कि शिक्षा के अधिकार के तहत आवेदन करे के आखिरी तिथि ह 10 जुलाई हे।

ऊहचे लाटरी निकाले के तारीख ल 15 जुलाई तय करे गे हे।  जेला ले के अब छत्तीसगढ़ एसोसिएशन ह मोर्चा खोल दे हे। क्योंकि राज्य के कई जिला म कोरोना के कहर जारी हे।

रायपुर, बिलासपुर अउ राजनांदगांव के संग कई बड़का जिला के गांव अउ शहर म कई वार्ड ल कन्टेनमेंट जोन बना दे गे हे अउ सील कर दे गे हे।
ए वार्ड म संक्रमित लोग अउ मरीज मन के संख्या ह सरलघा बाढ़त जावत हे, सैकड़ों लोगन मन ल क्वारेंटाइन म रखे गे हे। अइसे म कइसे आवेदन ल करे जा सकत हे।

पालक संघ के प्रदेश अध्यक्ष क्रिष्टोफर पॉल ह कहिन कि उच्च अधिकारी मन ल जिला शिक्षा अधिकारी अउ कलेक्टर मन ले सलाह कर जिला के परिस्थिति के अनुसार निर्णय ले जाना चाही,

लेकिन शायद अइसे नई होवत हे। शायद सरकार ह स्कूल सुरू करने म जल्दबाजी करत हे, जेन उचित नई हे।