मुख्यमंत्री ह पूर्व क्रिकेटर कुंबले संग आज मर्रा स्कूल म करिन हे शाला प्रवेशोत्सव के शुभारंभ

दुर्ग। मुख्यमंत्री भूपेश बघेल संग पूर्व भारतीय क्रिकेटर अनिल कुंबले ह राज्य स्तरीय शाला प्रवेशोत्सव के शुभारंभ करे बर दुर्ग जिला के मर्रा गांव म स्थित शासकीय उच्चतर माध्यमिक स्कूल पहुंचिस। इही मौका म शिक्षा मंत्री प्रेमसाय टेकाम घलो मौजूद रिहिस। बता देवथन कि इही मर्रा गांव के स्कूल म हमर राज्य के मुखिया भूपेश बघेल ह पढ़ई-लिखई करे हे। राज्यस्तरीय शाला प्रवेशोत्सव के शुरुआत संग ही स्कूल म डिजी दुनिया प्रोग्राम के शुरूआत भी करिस हे। मुख्यमंत्री ह मोबाइल एप अउ वेबसाइट्स लॉन्च घलो करिस हे। ये एप अउ वेबसाइट CGMMTB ल स्कूल शिक्षा विभाग ह तियार करे हे, ऐमा आदिवासी भाषा म पुस्तक तियार करे गे हे। ये मौका म स्कूल के विद्यार्थी मन ये सब्बो सुविधा बर मुख्यमंत्री के अभार जतईस हे।