जशपुर जिला ल कुपोषण मुक्त बनाए के संकल्प के संग ‘स्वस्थ माता-तंदुरुस्त बच्चा’ अभियान के करे गिस शुभारंभ

रायपुर। दाई अउ लइका मन के उत्तम स्वास्थ्य प्रदेश के उन्नति अउ समृद्धि के आधार बनहि। दाई अउ लइका के उत्तम स्वास्थ्य छत्तीसगढ़ के लोककल्याणकारी राज्य के सबले महत्वपूर्ण प्राथमिकता हे। मुख्यमंत्री विष्णुदेव साय ह आज जशपुर जिला के बगिया स्थित मुख्यमंत्री कैंप कार्यालय म आईआईटी बॉम्बे के सहयोग ले आईआईटी बॉम्बे-जशपुर पोषण मिशन अंतर्गत ‘स्वस्थ माता- तंदुरुस्त बच्चा’ अभियान के शुभारंभ करत ए बात कहीन।

मुख्यमंत्री विष्णु देव साय ह गर्भवती दाई अउ लइका मन के पोषण स्तर ल बेहतर बनाए बर जशपुर जिला म ‘स्वस्थ माता-तंदुरुस्त बच्चा’ अभियान के शुभारंभ करिन।

स्वास्थ्य विभाग अउ महिला अउ बाल विकास विभाग ह संयुक्त रूप ले संचालित ए अभियान के तहत 9500 ले ज्यादा स्वास्थ्य अउ आंगनबाड़ी कार्यकर्ता आईआईटी बॉम्बे के माध्यम ले पोषण संबंधी ऑनलाइन प्रशिक्षण प्राप्त करे के उपरांत दाई अउ लइका मन के पोषण अउ स्वास्थ्य के ख्याल रखे बर पूरा तरह ले तैयार हे। अभियान के तहत 300 ले ज्यादा मास्टर ट्रेनर जिले म स्वास्थ्य विभाग अउ महिला अउ बाल विकास विभाग के मैदानी कार्यकर्ता मन ल सतत प्रशिक्षण प्रदान करहि। ए पहल के मुख्य उद्देश्य जशपुर जिला म कुपोषण ल पूरा तरह ले समाप्त करे अउ दाई अउ लइका मन के स्वास्थ्य म सुधार लाना हे। अभियान के तहत् गर्भवती माता, शिशुवती माता अउ 6 बछर तक के लइका मन ल कुपोषण ले मुक्त करे के लक्ष्य हे। एमा विशेष रूप ले स्तनपान, पोषण आहार अउ पूरक आहार म ध्यान केंद्रित करे गे हे। ए पहल के जरिया गर्भवती माता मन ल सही पोषण के जानकारी देय जाहि, जेखर ले लइका मन शारीरिक अउ मानसिक रूप ले स्वस्थ बन सकय।

मुख्यमंत्री साय ह ‘स्वस्थ माता- तंदुरुस्त बच्चा’ अभियान के सराहना करत कहिन कि ए पहल जिला म स्वास्थ्य अउ पोषण के प्रति जागरूकता ल बढ़ाहि, संग म कुपोषण ल खत्म करे बर अउ गर्भवती माता, शिशुवती माता अउ 6 बछर तक के लइका मन के स्वास्थ्य म सुधार लाए म सहायक होहि।