बदली जिनगी, बढ़िस आत्मविश्वास: रजनी उइके बनिन ‘लखपति दीदी’

• पोल्ट्री फार्म, फोटो कॉपी अउ चॉइस सेंटर ले पूरा होइस आत्मनिर्भरता के सपना
• आर्थिक मजबूती ले संवरत हे परिवार: स्वरोजगार ह दीस मान-सम्मान के नवा पहचान

रायपुर, मुख्यमंत्री विष्णु देव साय के अगुवाई में छत्तीसगढ़ सरकार कोति ले महिला मन के आर्थिक सशक्तिकरण अउ आत्मनिर्भरता ला बढ़ावा देय बर कतको जन-कल्याणकारी योजना मन ला बढ़िया ढंग ले चलाय जात हे। ए योजना मन के मदद ले गांव-देहात के महिला मन अब सिरिफ घर के काम-काज तक सीमित नइ हें, बल्कि स्वरोजगार के डहर में आगू बढ़त हें अउ अपन परिवार के आर्थिक स्थिति ला मजबूत बनाय में बड़े भूमिका निभावत हें। कोरबा जिला के कटघोरा विकासखंड के ग्राम पंचायत बतारी के रहइया रजनी उइके के सफलता के कहानी ए बदलाव के एक मजबूत उदाहरण आय।

रजनी उइके ह स्नातक (बी.ए.) तक पढ़ाई करे हे। पढ़ाई पूरा करे के बाद ओमन सिरिफ घरवाली बनके नइ रहे बर चाहत रहिन, बल्कि अपन दम ऊपर कुछ नवा करे के संकल्प ओकर मन में रहिस। बछर 2022 ओकर जिनगी में एक बड़े मोड़ लेके आइस, जब ओमन ला बिहान योजना के बारे में पता चलिस। ओमन ‘जय लक्ष्मी स्व-सहायता समूह’ ले जुड़के अपन सपना मन ला पूरा करे के डहर में कदम बढ़ाइन।

समूह ले जुड़े के बाद ओमन ला अलग-अलग किसम के ट्रेनिंग, मार्गदर्शन अउ आर्थिक मदद मिलिस, जेकर ले ओकर आत्मविश्वास अउ मनोबल बढ़िस। स्व-सहायता समूह के माध्यम ले ओमन ला आरएफ (RF) मद ले 8 हजार रुपिया अउ सीआईएफ (CIF) मद ले 30 हजार रुपिया के सहायता मिलिस। संग ही बैंक ले 1.5 लाख रुपिया के लोन लेके ओमन अपन घर में ही पोल्ट्री फार्म (मुर्गी पालन), फोटो कॉपी अउ चॉइस सेंटर जइसे काम सुरू करिन।

आज श्रीमती उइके ह ए सबो काम-काज ला बड़े सुघ्घर ढंग ले चलावत हें। ओकर मेहनत ले न केवल ओकर कमाई बढ़िस हे, बल्कि परिवार के आर्थिक हालत में घलो बड़े सुधार आय हे। अभी के बखत में ओकर सालाना कमाई लगभग 1 लाख 10 हजार रुपिया तक पहुँच चुके हे, जेकर ले ओमन ‘लखपति दीदी’ के रूप में अपन पहचान बना चुके हें।

ओमन बताथें कि—”पहिली परिवार के पूरा जिम्मेदारी सिरिफ मोर घरवाला ऊपर रहिस, फेर अब मैं खुद घलो पैसा-कउड़ी के मदद कर पावत हंव। एकर ले हमर परिवार मजबूत अउ आत्मनिर्भर बन गे हे।”

ओमन बताइन कि योजना के माध्यम ले ओकर जिनगी में बने बदलाव आय हे अउ अब ओमन ककरो ऊपर भरोसा (निर्भर) नइ हें। ए सफलता बर ओमन मुख्यमंत्री विष्णु देव साय के आभार जतावत कहिन कि सरकार के योजना मन ह ओमन ला रोजगार के मउका दीस, जेकर ले ओमन आत्मनिर्भर बन सकिन।