नक्सलवाद के खात्मा के बाद बदलिस तस्वीर :अब गाँव ले सहर तक आसान होइस सफर

मुख्यमंत्री ग्रामीण बस योजना बनीस ग्रामीण मन बर वरदान

रायपुर. कभु नक्सल प्रभाव अउ दुर्गम रद्दा मन के सेती जेन गाँव के मनखे मन अपन इलाका म ही सिमटे रहिन, आज उही ग्रामीण मन बिना कोनो डर के सहर तक आवत-जावत हें। माओवाद के खतम होय अउ सुरक्षा व्यवस्था के मजबूत होय के संग-संग सरकार के जनहितकारी योजना मन ह सुकमा जिला के दूर-दराज इलाका म विकास के नवा कहानी लिखना सुरू कर दे हें।

ए बदलाव के एक ठन तगड़ा उदाहरण मुख्यमंत्री ग्रामीण बस योजना आय, जे ह वनांचल अउ अंदरूनी क्षेत्र के जनजीवन ला नवा गति प्रदान करे हे। सुकमा जिला के कोंटा विकासखंड के दूर के गाँव लखापाल, केरलापेंदा अउ नागाराम समेत आसपास के गाँव मन बर अब दोरनापाल तक पहुँचना सहज अउ सुरक्षित हो गे हे।

पहिली ग्रामीण मन ला मुख्य सड़क तक पहुँचे बर 8 ले 10 किलोमीटर तक पैदल चलना पड़त रहिस। ग्राम लखापाल के रहइया कूड़ाम जोगा ह बताथें कि बस सेवा सुरू होय ले पहिली चिंतलनार तक पैदल जाना ओकर मन के मजबूरी रहिस। कतको बार बस छूट जाय के सेती पूरा दिन बेकार जावत रहिस अउ जरूरी काम मन अधूरे रह जावत रहिस। अब दोरनापाल-नागाराम रद्दा म नियमित बस चले ले ए समस्या ह पूरी तरह खतम हो गे हे।

मुख्यमंत्री ग्रामीण बस योजना के तहत बस सेवा अब पोलमपल्ली, कांकेरलंका, चिंतागुफा, चिंतलनार, लखापाल, केरलापेंदा अउ नागाराम कस गाँव मन के तीर ले गुजरत हे। एकर ले ग्रामीण मन अब आसानी ले बस म चड़ के दोरनापाल पहुँचथें अउ अपन रोज के काम ला बखत म पूरा करके उही दिन सुरक्षित घर घलो लहुट जाथें। ए सुविधा ह खास करके महिला, सियान, पढ़इया लइका अउ मजूर मन बर भारी काम के साबित होवत हे।

जिहाँ पहिली नक्सली मन के डर के सेती ग्रामीण मन के बाहर निकलना घलो मुस्किल रहिस, उहें अब सुरक्षा के माहौल सुधरे ले ओमन बिना कोनो डर के रोजगार, व्यापार, शिक्षा अउ इलाज बर सहर कोति जावत हें। बस सुविधा ह न केवल आना-जाना ला सुग्घर बनाय हे, बल्कि ग्रामीण अर्थव्यवस्था ला घलो नवा तेजी प्रदान करे हे।

इरकमपल्ली के रहइया मोहनरंजन ह मुख्यमंत्री विष्णु देव साय के आभार मानत कहिन कि ये योजना ह दूर के इलाका मन ला मुख्यधारा ले जोड़े के एक ठन मजबूत माध्यम बनत हे। एकर ले न केवल रद्दा मन ले जुड़ाव बढ़े हे, बल्कि रोजगार अउ आर्थिक काम-काज ला घलो बल मिले हे।

कलेक्टर अमित कुमार के मुताबिक, सुकमा के नक्सल प्रभावित अउ दूर के क्षेत्र मन म अभी मुख्यमंत्री ग्रामीण बस योजना के तहत 10 बस मन के संचालन करे जावत हे। एकर अलावा 5 ‘हक्कुम मेल’ बस मन घलो नियमित रूप ले चलत हें। बस चलाय ला बढ़ावा देय बर सरकार कोति ले सब्सिडी दिय जावत हे अउ तीन बछर बर रोड टैक्स म घलो छूट दिय गे हे।

मुख्यमंत्री ग्रामीण बस योजना अब सिरिफ एक ठन परिवहन सुविधा नई, बल्कि सुकमा जिला के ग्रामीण अंचल म बिस्वास, सुरक्षा अउ विकास के पहिचान बन चुके हे। नक्सलवाद के अंधियारी ले निकल के ये क्षेत्र अब तरक्की अउ आत्मनिर्भरता कोति लगातार बढ़त हे।