छत्तीसगढ़ म घलो प्रवेश कर सकत हे टिड्‌डी दल, प्रशासन ह अलर्ट

जय जोहार…. कृषि विभाग ह राज्य म घलो टिड्‌डी दल के हमले के आशंका जताय हे। विभाग ह किसान मन ल खेत के फसल ल एखर ले बचाय के प्रति आगाह घलो करे हे। कृषि विभाग के अनुसार टिड्‌डी दल ह राजस्थान, मध्यप्रदेश अऊ महाराष्ट्र ले होके तेजी ले छत्तीसगढ़ के ओर पहुंचत हे। अवइया कुछु दिन म एखर छत्तीसगढ़ आय के संभावना जताय गे हे। कृषि विभाग ह एखर बचाव के वैज्ञानिक अऊ स्थानीय उपाय करे के परामर्श ल किसान मन बर जारी करे हे।

उपसंचालक कृषि वीपी चौबे ह बताइस कि टिड्‌डी के एक बड़का झुण्ड ह एक घंटा म कई एकड़ फसल ल खाके चट कर सकत हे। रद्दा के फसल ल खावत हुये टि़ड्‌डी दल ह आगू बाढ़त हे। रात म ए खेत म रूक के फसल ल खावत हे। मादा टिड्‌डी ह रात म 500 ले 1500 अंडे दे के बिहनिया आगू बाढ़ जावत हे।