शिव के बरात के संग निकलिस सांई पालकी , नाचत कूदत शामिल रहिन भक्त मन

जय जोहार…. महाशिवरात्रि के मौक़ा म राजधानी के शिवालय मन म खूब भीड़ देखे गिस , जगह जगह पूजा अर्चना अऊ भंडारा के आयोजन करे गिस , शाम के भगवान् शिव के बरात घलो निकलिस , सांई राज परिवार रामसागरपारा के द्वारा शिव के बरात अऊ सांई पालकी निकाले गिस जेमा भक्त मन बड संख्या म शामिल होइन ,

ये मौक़ा म गजानंद किशोर समाज मंदिर ले भगवान शिव के पूजा अर्चना के बाद बरात के संग सांई पालकी शुरू होईस , ये पालकी रामसागरपारा ले बढई पारा , मोमिन पारा ,तात्यापारा ,शारदा चौक ,जय स्तम्भ चौक ,एम जी रोड ,गुरुनानक चौक अऊ राठौर चौक होत वापस रामसागरपारा आइस ,

ये मौक़ा म जगह जगह भक्त मन बर प्रसाद वितरण के व्यवस्था घलो करे गे रिहिस , बरात म डीजे के धुन म भक्त मन खूब झूमिस अऊ ए बार विशेष झांकी घलो राखे गे रिहिस दर्शन बर, समिती के किशोर बजाज , शीबू , कुनाल नकाडे , वैभव अगरवाल अऊ सब्बो सदस्य मन रामसागरपारा के बड़े बुजुर्ग मन के सहयोग ले अतना सुन्दर कार्यक्रम होय बर धन्यवाद दिन हे.