आम जनता ल सासन के फ्लैगशिप योजना मन के लाभ दियाय बर सूचना प्रौद्योगिकी के जादा से जादा प्रयोग करव: मुख्य सचिव
सूचना प्रौद्योगिकी ऊपर सूचना विज्ञान अधिकारी मन के कार्यशाला सम्पन्न
रायपुर. मुख्य सचिव विकासशील ह कार्यशाला ल सम्बोधित करत कहिन कि सासन के सब्बो योजना मन के जादा से जादा फायदा मनखे मन ल तुरते मिलय, एकर बर सूचना प्रौद्योगिकी के सब्बो जरूरी नवा तकनीक मन के उपयोग करे जाय। ओमन कहिन कि सूचना अउ संचार संस्थान मन ल अपन कार्यक्रम, मोबाइल ऐप, वेबसाइट मन ल नागरिक केन्द्रित अउ अइसन बनाना चाही जेकर उपयोग आसानी से करे जा सकय। ओमन कहिन कि नागरिक सेवा बर सूचना प्रौद्योगिकी के उपयोग करे अउ सासन के फ्लैगशिप योजना मन के फायदा हितग्राही मन तक जल्दी पहुँचाय बर सूचना प्रौद्योगिकी ऊपर बिस्तार से गोठ-बात (विचार-विमर्श) होय हे।
मुख्य सचिव विकासशील ह आज इहाँ मंत्रालय महानदी भवन म उभरत नवा सूचना प्रौद्योगिकी ऊपर आधारित एक दिन के कार्यशाला के सुभारंभ करिन।
मुख्य सचिव कहिन कि एनआईसी के अधिकारी मन ल नवा आईटी ले हमेसा अपडेट रहना चाही। नवा सूचना तकनीक ले सासन के योजना मन के लाभ हितग्राही मन ल तुरते मिलना चाही। सूचना अउ प्रौद्योगिकी विभाग के सचिव श्री अंकित आनंद ह राज्य स्तरीय सूचना केन्द्र अउ जिला सूचना विज्ञान केन्द्र मन के अधिकारी मन ले ओकर संस्थान म उपलब्ध संसाधन अउ उपकरण मन के स्थिति अउ जरूरत के बारे म जानकारी लीन।
कार्यशाला के सुभारंभ सत्र म राष्ट्रीय सूचना विज्ञान केन्द्र मुख्यालय नई दिल्ली के डीडीजी दयानंद साहा ह कहिन कि अलग-अलग नवा सूचना प्रौद्योगिकी के माध्यम ले सासन के योजना मन के जरिये हम नागरिक मन ल सेवा दे सकथन। कार्यशाला म सूचना प्रौद्योगिकी के जानकार अधिकारी मन ह प्रतिभागी मन ल जानकारी दीन। कार्यशाला म ट्रिपल आईटी के संचालक अउ कुलपति प्रोफेसर डॉ. ओम प्रकाश व्यास ह एआई (AI) के उपयोग के संबंध म बड़का जानकारी दीन।
एनआईसी छत्तीसगढ़ के संयुक्त संचालक श्रीकांत पाण्डे ह साईबर सुरक्षा, संयुक्त संचालक अभिजीत कौशिक, उपेन्द्र सिंह संग अउ दूसर आईटी जानकार मन घलो सम्बोधित करिन। कार्यशाला म जिला मन ले आय जिला सूचना विज्ञान अधिकारी अउ राज्य स्तरीय सूचना विज्ञान केन्द्र के अधिकारी मन के संग राष्ट्रीय सूचना विज्ञान केंद्र के अलग-अलग जिला म काम करत जिला सूचना विज्ञान अधिकारी अउ एनआईसी के राज्य स्तरीय अधिकारी मन सामिल होइन।
