छत्तीसगढ़ के पारंपरिक गीत अउ संगीत ले लबरेज हे मंदरा जी, दर्शक मन ल अलग तरह के फिलिम लगीस
छत्तीसगढ़ के पहिली बायोपिक फीचर फिलिम मंदरा जी ह शुक्रवार के राजधानी के प्रभात सिनेमा घर के संग संग अन्य स्थान मन म प्रदर्शित होइस। फिलिम ह लीक से हट के हे एखर सेति दर्शक मन ल ये पसंद आवत हे। प्रभात सिनेमा घर म फिलिम के सदस्य मन के संगे संग निर्देशक सतीश जैन , प्रेम चंद्राकर , पद्मश्री ममता चंद्राकर अउ संजय बत्रा समेत बड़ संख्या म दर्शक मन पहुंचिन ।
फिलिम के शुरू म पता लगथे कि कुछ अलग विषय ल लेके मंदरा जी बनाए गे हे। कुछ देर बाद पता चल जाथे कि कोई कलाकार के जीवन म आधारित हे ये फिलिम ह अउ वो कलाकार हे मंदरा जी । मंदरा जी के रोल म करन खान ह पूरा न्याय करे हे, उहींचे ज्योति पटेल ह घलोक उम्दा अभिनय करके ओखर साथ दीस हे। सब्बो कलाकार मन के काम सराहनीय हे।
फिलिम देख के बाहर निकलिस दर्शक मन किहिंन कि अभी तक घटिया प्रेम कहानी के फिलिम देखत रहेंन , ये टाइप के फिलिम पहली बार देखे बर मिले हे। वाकई में देखे योग्य फिल्म हावे मंदरा जी।
