सारवजनिक वितरन प्रनाली के चावल के हेराफेरी

..
अम्बिकापुर । सरगुजा जिला के लखनपुर थाना अंतरगत सारवजनिक वितरन प्रनाली के चावल म हेराफेरी करे के कोसिस ल लखनपुर पुलिस ह विफल कर दिस हे। पुलिस ह करीब 198 क्विंटल पीडीएस के चावल ले लदे ट्रक ल जब्त कर चालक ल गेरफ्तार कर लिस। खाद्य विभाग ल घलोक मामला के जानकारी देय गिस हे। जब्त चावल सरकारी तउर म सप्लाई होवइया बोरा म लोड रहिस हे। पुलिस अधीक्छक सदानंद कुमार ह सरकारी रासन के गड़बड़ी मामला म सख्त कार्रवाई करे के आदेस दिस हे। पुलिस ह बताइस के ट्रक म 134 सफेद प्लास्टिक बोरी अउ 64 पीडीएस के बोरा म प्रति बोरा 50-50 किलो चावल भरे हुए रहिस हे। कुल 198 बोरा चावल समेत एक ट्रक ल जब्त कर के चालक के खेलाफ आवस्यक वस्तु अधिनियम के धारा 3, 7 के तहत कार्रवाई करिस हे। पुलिस के ये कार्रवाई ले सरकारी रासन चोर मन म खलबली मचे हुए हे।