विशेष पिछड़ी जनजाति पहाड़ी कोरवा परिवार मन बर हर महीना मेडिकल कैंप लगाए जाय – राज्यपाल रमेन डेका”
- पर्यावरण के रक्षा अउ बढ़ाव बर लगावव पौधा,
- किसान मन ला जैविक खेती बर करव जागरूक
रईपुर. राज्यपाल रमेन डेका ह इतवार के जिला पंचायत के सभाकक्ष म जिला स्तरीय अउ जशपुर विकासखंड के अधिकारी मन के समीक्षा बैठक लीन। ओमन पर्यावरण के बचाव अउ ओला बढ़ाय बर जादा ले जादा रुख लगाय बर मनखे मन ल उत्साहित करीन अउ ‘एक पेड़ मां के नाम’ अभियान ल बने ढंग ले चलाय के निर्देश दीन।
ओमन जिला म टीबी के संभावित मरीज मन के जानकारी लीन अउ मुख्य चिकित्सा स्वास्थ्य अधिकारी ल मरीज मन के बने ढंग ले ईलाज कराय बर कहिन। ओमन कहिन कि माई लोगन मन बर स्तन कैंसर के विशेष जांच अउ ईलाज के सुविधा तको कराय जाय। मरीज मन ल जरूरत पड़े म मेडिकल कॉलेज रायपुर, अंबिकापुर अउ एम्स रायपुर भेज के ईलाज कराय के निर्देश ओमन अधिकारी मन ल दीन।
राज्यपाल रमेन डेका ह सिकल सेल बीमारी अउ रेड क्रॉस सोसायटी के काम-काज के तको जानकारी लीन। ओमन कहिन कि रेड क्रॉस सोसायटी ह विशेष पिछड़ी जनजाति के बस्ती मन म अउ गांव-गांव म स्वास्थ्य शिविर लगावय। ए मउका म कलेक्टर रोहित व्यास, वरिष्ठ पुलिस अधीक्षक डॉ. लाल उमेद सिंह, जिला पंचायत सीईओ अभिषेक कुमार, वनमंडला अधिकारी शशि कुमार अउ जिला अउ विकास खंड के अधिकारी मन उपस्थित रहिन।
ओमन विशेष पिछड़ी जनजाति पहाड़ी कोरवा अउ बिरहोर परिवार मन बर हर महीना मेडिकल कैंप लगा के जांच करे बर कहिन अउ ओ मन के जिनगी म बदलाव लाय बर शिक्षा के मुख्य धारा ले जोड़े के निर्देश दीन। ओमन कहिन कि पिछड़ी जनजाति के बस्ती मन म संझा के बखत अलग-अलग कार्यक्रम करके ओ मन के बुद्धि अउ कौशल के विकास करे जाय। राज्यपाल ह जिला म नवाचार (Innovation) ल बढ़ावा दे बर कहिन अउ संरक्षित जनजाति परिवार मन बर पायलट प्रोजेक्ट चालू करे के निर्देश दीन।
राज्यपाल रमेन डेका ह लइका मन ल नशाखोरी ले दूर रखे बर विशेष कोसिस करे बर कहिन। समीक्षा के बखत ओमन जशपुर जिला के ‘लखपति दीदी’ लालमणि प्रजापति के सम्मान करे के बात कहिन। ओमन कहिन कि लखपति दीदी ह बहुते बने काम करे हे, ओला राजभवन म सम्मानित करे जाही।
राज्यपाल ह जशपुर के स्व सहायता समूह के माइलोगन मन ल आत्मनिर्भर बनाय अउ हस्तकला म निपुण करे बर ओ मन ल असम अउ उड़ीसा भेजे के निर्देश दीन, ताकि समूह के दीदी मन बाजार के मांग के हिसाब ले नवा डिजाइन के साड़ी, साल अउ आन समान बना सकें।
रमेन डेका ह पानी बचाप अउ ओला बढ़ाय बर बने काम करे के निर्देश दीन। ओमन छोटे-बड़े किसान मन के खेत म डबरी बनाय अउ पुराना कुआं मन के मरम्मत (जीर्णोद्धार) करे बर कहिन। योग ल बढ़ावा दे बर रोज अभ्यास करे के निर्देश दीन। समीक्षा म ओमन वरिष्ठ नागरिक अउ 75 साल ले जादा उमर के सियान मन के आयुष्मान कार्ड बनाय बर कहिन।
किसान मन के आर्थिक विकास बर ओ मन ल खेती के आधुनिक तकनीक के जानकारी दे बर कहिन। किसान मन ल वर्मी कंपोस्ट खाद अउ जैविक खेती (Organic farming) बर प्रोत्साहित करे के निर्देश अधिकारी मन ल दीन।
बैठक म कलेक्टर रोहित व्यास ह जानकारी दीन कि पानी बचाव बर रैन वाटर हार्वेस्टिंग, अमृत सरोवर, सोकपिट अउ मैजिक पिट बनाय जावत हे। ओमन बताइन कि किसान मन ल जैविक खेती बर तैयार करे जावत हे। स्वच्छता बर गांव मन म कचरा कलेक्शन अउ सेग्रेशन शेड के काम चलत हे।
कलेक्टर ह बताइन कि जिला म स्वास्थ्य सुविधा मन ल बढ़ाय जावत हे। जम्मो विकास खंड म 100 दिन के ‘निक्षय निरामय’ अभियान चलत हे। जिला मुख्यालय म जिला ग्रंथालय (Library) बिहनिया 6 बजे ले रात 11 बजे तक खुलथे, जिहां लइका मन बर फ्री वाई-फाई के सुविधा हे। ए लाइब्रेरी म 6425 किताब हवय।
कलेक्टर ह बताइन कि विज्ञान अउ प्रौद्योगिकी ल बढ़ावा दे बर 7 अप्रैल ले ‘अन्वेषण’ कार्यक्रम होही। जशपुर के पढ़इया लइका मन ल अंतरिक्ष विज्ञान अउ इसरो (ISRO) के उपलब्धि मन ले परिचित कराय बर ‘स्पेस ऑन व्हील्स’ अन्वेषण कार्यक्रम के आयोजन करे जावत हे।
