रायपुर। आबकारी मंत्री कवासी लखमा के नाम ले रजिस्टर्ड हैक्सा कार के उपयोग कर ट्रांसपोर्टर मन ले 2 करोड़ ले जादा के ठगी करईया फरार दू आरोपी ल पुलिस ह गिरफ्तार करिन हे। ये बात ले खुश होके आबकारी मंत्री कवासी लखमा ह आरोपी मन ल पकड़ईया पुलिस टीम ल सम्मानित करिन हे।
मामला के खुलासा करत एसएसपी आरिफ शेख ह बताईन कि गिरफ्तार आरोपी खुर्सीपार भिलाई के रहईया शिवा कुमार अउ दूसर आरोपी राजनांदगांव के रहईया आरिफ खान हरे। बता दे कि प्रार्थी जाकिर खान ह नेशनल गैरेज ले पुरानी टाटा हैक्सा गाड़ी खरीदे रिहिस, जेन ह मंत्री कवासी लखमा के नाम म रजिस्टर्ड रहीस।
मंत्री के ओएसडी ह उंखर बेचे गे वाहन के दुरूपयोग करे के संबंध म पुलिस महानिरीक्षक ल शिकायत पत्र दे रिहिस। जेमा सिविल लाइन थाना म आरोपी मन के खिलाफ धारा 419, 420, 34 के तहत अपराध दर्ज करे गे रहीस।
पुलिस ह जांच के दउरान आरोपी मन ल नागपुर अउ राजनांदगांव म पकड़िन हे। आरोपी मन हाईवा मालिक मन ल जादा कीमत म किराया म वाहन ल चलाए के झांसा देके 2 करोड़ ल जादा के ठगी के वारदात ल अंजाम दे रहीस। आरोपी मन हाईवा गाड़ी के मालिक के संग ईकरारनामा तियार कर सबो हाईवा गाड़ी ल बेच दिस अउ भारत के कई राज्य म 15 ले जादा हाईवा वाहनहल महाराष्ट्र, आंध्रप्रदेश अउ कनार्टक म बेचे के बात कहिस हे।
Other Articles
