रायपुर. नगरीय निकाय मंत्री शिव डहरिया ह मंगलवार के सर्किट हाउस म समीक्षा बैइठक लिस। बैइठक म काम म लपरवाही करईया एक इंजीनियर ल सस्पेंड करे के आदेश दे हे। संग म सात सीएमओ ल शो-कॉज नोटिस जारी करे गे हे अउ दू मामला म एफआईआर दर्ज कराए बर आदेश दिन हे।
मंत्री डहरिया ह निरमान काम म लपरवाही करईया राहोद नगर पंचायत के सीएमओ ल शो कॉज नोटिस जारी करिस। उंहे मोर ज़मीन– मोर मकान योजना म हितग्राही ले पैइसा ले के शिकायत सही पाए गिस, जेखर बर एफआईआर अउ बर्खास्तगी के निरदेश अधिकारी मन ल दे हे ।
बिल्हा नगर पंचायत के सीएमओ के अलावा सरगांव अउ घरघोडा के मुख्य म्यूनिसिपल अफसर ल आवास योजना म लपरवाही बर नोटिस जारी करे गे हे। अउ ओखर ले जवाब मांगे हे कि उंखर खिलाफ कर्रवाई क्यों ना करे जाए।
सीएमओ भानुप्रतापपुर अउ इंजीनियर ल आवास योजना म लापरवाही के आरोप म शो कॉज नोटिस जारी करे हे। इही तरह ले जांजगीर के खरौद म सब इंजीनियर ल तत्काल परभाव ले सस्पेंड करिस हे। पुसौर म निविदा म गड़बड़ी के शिकायत के उच्चस्तरीय जाँच के निरदेश दिस अउ मंत्री शिव डहरिया ह कहिन कि दोषी पाए जाही त उंखर खिलाफ एफआईआर दर्ज करे जाए।
कम राजस्व वसूली के शिकायत म धरमजयगढ़ नगर पंचायत के सीएमओ ल शो काज नोटिस जारी करे गिस। शिवरीनारायण म अवैध नीलामी के शिकायत के जाँच बर संयुक्त संचालक ल निरदेश दिस हे। जांजगीर के डबरा म नगर पंचायत के काम लचर पाए गिस, जेखर बर सीएमओ ल तत्काल पद ले हटाय के निरदेश दे गिस। पार्षद निधि ले 53 लाख रूपिया म कुर्सी खरीदी के मामला के जांच बर आदेश दे गे हे।
