जय जोहार। जिला कलेक्टर मन से डीएमएफ के हिसाब मांगी से तेखर प्रदेश कांग्रेस के महामंत्री अऊ संचार विभाग के अध्यक्ष शैलेश नितिन त्रिवेदी ह सुवागत करे हे। अऊ वो ह कहिन हे कि सरकार में जवाबदेही हरेक स्तर पर तय होना चाही। जेन लोग मन ह माइनिंग ले प्रभावित होवत हे ओखर मन बर माइनिंग डेवलपमेंट फंड ल बनाए गे हे। जेन लोग मन के पूरा जीवन अऊ ओखर इलाका ह माइनिंग म नाश हो गे हे अइसने लोग मन बर डीएमएफ के माध्यम से ओखर जीवन यापन बर वैकल्पिक साधन जुटाय जाय।
त्रिवेदी ह कहिन हे कि जेन क्षेत्र म माइनिंग के सेती विकास प्रभावित होय हे ऊहां विकास बर नवा रस्ता बनाय जा सकथे चाहे स्कूल हो, अस्पताल हो या सड़क होवय। दुर्भाग्य से रमन सरकार म लगातार डीएमएफ के पैसा के दुरूपयोग करिस हे अऊ कई जिला म कलक्टर मन ह येखर रूपया के अफरातफरी करे म माध्यम बनिस।
त्रिवेदी ह कहिन हे कि राष्ट्रीय एजेंसी सेंटर फॉर साइंस एंड एनवायरमेंट (सीएसई) के छत्तीसगढ़ म ज़िला खनिज कोष याने डिस्ट्रिक्ट डेवलपमेंट कोष (डीएमएफ़) ल लेके जारी रिपोर्ट म कहे हे कि छत्तीसगढ़ के रमन सिंह सरकार म निवेश ल जनता मन से जोड़े की बजाय निर्माण म लगा दिस। खनन से प्रभावित लोग मन ल जादा पैसा जाना रिहिस हे ऊहां तक एक परतिशत राशि भी नई पहुंचेये ।
त्रिवेदी ह कहिन हे कि सीएसई ह अपन रिपोर्ट म बताय हे कि छत्तीसगढ़ म डीएमएफ़ के पैसा के निवेश निर्माण प्रेरित हे, याने बिल्डिंग अऊ रोड बनाय म दिलचस्पी रिहिस हे। डीएमएफ़ से कुल 3,133 करोड़ रूपया के काम ल मंज़ूरी दे दिस। सीएसई के अनुसार येखर 28 परतिशत हिस्सा ल निर्माण कार्य बर दे रिहिस, शिक्षा के नाम पर 25 परतिशत खर्च करे गिस ओला भी सिरफ भवन बनाय म। शिक्षा बर जेन निवेश करे गिस ओखर 58 परतिशत भाग ह भवन बनाए में चले गिस, पढ़ाई बर ध्यान नई देके भवन बनाय म दिस ।
