रायपुर. छत्तीसगढ़ के दंतेवाड़ा म लोकसभा चुनाव 2019 के पहिली चरण के वोटिंग ले महज 36 घंटे पहिली नक्सली मन ह बड़का हमला ल अंजाम दिस हे. नक्सली मन ह मंगलवार के दंतेवाड़ा के कुआंकोण्डा थाना क्षेत्र के श्यामगिरी म बीजेपी के काफिला ल निशाना बनात हुए IED ब्लास्ट कर दिस. ये हमला म बीजेपी विधायक भीमा मंडावी समेत पांच लोगन के मऊत हो गिस हे.
डीआईजी सुंदरराज पी. ह कहिन के, ‘घटना के जानकारी मिले हे. मऊका म सुरक्षाबल के अतिरिक्त जवान मन ल रवाना कर देय गिस हे. घटना म दंतेवाड़ा के विधायक भीमा मंडावी, उंखर ड्राइवर अउ तीन पीएसओ के मऊत हो गिस हे.’
पुलिस के मुताबिक कुआकोंडा थाना क्षेत्र के श्यामगिरी म नकुलनार म नक्सली मन बीजेपी विधायक के काफिला उपर हमला करिस हे. विधायक भीमा मंडावी जे गाड़ी म रिहिस हे, ओ गाड़ी ल त लगाके बइठे नक्सली मन ह निशाना बनात हुए आईईडी ब्लास्ट कर दीन. ब्लास्ट अतना बड़का रिहिस के गाड़ी परखच्चा उड़ गिस.
बता देवन के, दंतेवाड़ा बस्तर संसदीय क्षेत्र के हिस्सा हे, जिहां 11 अप्रैल के वोटिंग होना हे. वोटिंग ले महज 36 घंटा पहिली नक्सली मन ह ये हमला ल अंजाम देय हे. इलाका म नक्सली लगातार चुनाव बहिष्कार के फरमान क्षेत्र म जारी करत हवय.
ये पहिली बेर नइए, जब बस्तर म नक्सली मन ह चुनाव ले पहिली कोनो राजनीतिक दल के काफिला म हमला करिन हे. येकर पहिली 25 मई 2013 के झीरम घाटी म नक्सली मन ह कांग्रेस के काफिला ल निशाना बनाय रिहिस हे. ये हमला म वरिष्ठ कांग्रेस नेता वीसी शुक्ल, छत्तीसगढ़ कांग्रेस के तत्कालीन अध्यक्ष नंदकुमार पटेल अउ बस्तर के कद्दावर नेता महेंद्र कर्मा समेत 30 लोगन के मउत हो गे रिहिस हे. ये हमला म छत्तीसगढ़ कांग्रेस के टॉप ऑर्डर खत्म हो गे रिहिस हे.
Other Articles
