जय जोहार…. कोरोना वायरस के संक्रमण अऊ बचाव बर अपन तैयारी ल परखे बर कलेक्टर डॉ. सर्वेश्वर नरेंद्र भुरे के मार्गदर्शन म डेमो करे गिस। संक्रमित मरीज ल घर ले अस्पताल तक सुरक्षित रूप ले पहुंचाए ल, कंटेनमेंट जोन अऊ कांटेक्ट ट्रेसिंग आदि के तैयारी के संबंध म विकासखंड लोरमी के ग्राम गोड़खाम्ही म मॉकड्रील करे गिस।
ये मॉकड्रील म कानून अऊ व्यवस्था, चिकित्सा ले जुड़े टीम ह पूर्व निर्धारित समय म पहुंच गिस। ए दौरान डेमो कोरोना वायरस पॉजिटिव मरीज के निवास के आसपास ल सेनिटाइज करे गिस। मेडिकल टीम के संगेसंग संपर्क ट्रेसिंग टीम घलो पहुंच गिस अऊ डेमो कोरोना वायरस पाजिटिव मरीज अऊ ओखर परिजन मन के संर्पक ट्रेसिंग फार्म भरे गिस अऊ सबो संपर्क के जानकारी ले गिस।
कलेक्टर डॉ भुरे ह बताइस कि मॉकड्रील ले संभावित खतरा ले बचाव अऊ सुरक्षा ल लेके प्रशासन ह अपन तैयारी ह परखत हे। ए दौरान होय त्रुटि ल सुधारे जात हे। ए प्रकिया म अंतर विभागीय अऊ अलग-अलग बचाव टीम के मध्य समन्वय अऊ मानक संचालन के प्रक्रिया ल धरातल म परखे गिस, ए मॉकड्रील पूरा तरह ले सफल रहिस।
