2 तारीक से सुरू होवइया सत्र म 389 तारांकित प्रस्न
रायपुर । छत्तीसगढ़ विधान सभा के मानसून सत्र ल लेके आज सोमवार के विधानसभा अध्यक्ष गौरीशंकर अग्रवाल ह प्रेस कॉन्फ्रेंस लेके कहिन के विधानसभा के मानसून सत्र 2 ले 6 जुलाई तक होही। ये दउरान 5 बइठक आयोजित करे जाही। 3 जुलाई के अनुपूरक बजट पेस होही। 4 जुलाई के येमा चर्चा होही। इही दिन विनियोग विधेयक घलो पेस करे जाही।
उमन ह बताइन के ये सत्र म 389 तारांकित प्रस्न लगाए गे हे। येखर अलावा दू असासकीय संकल्प प्राप्त होय हे। विधानसभा अध्यक्ष ह कहिन के विधान सभा परिसर म 14 फीट ऊंचा स्वामी विवेकानंद के प्रतिमा के 5 जुलाई के अनावरण करे जाही। उहें प्रेक्षागृह म श्यामाप्रसाद मुखर्जी के अर्ध प्रतिमा के घलो अनावरण करे जाही। सत्र के दउरान ही वरिष्ठ पत्रकार मन के सम्मान करे जाही । विधान सभा ल पेपरलेस करे के पूरा कोसिस करे जात हे। नवा विधान सभा बर टेंडर के प्रक्रिया चलत हे।
