गंदा पानी पीये ले ये जिला म 50 ले अधिक लइका बीमार, स्वास्थ्य विभाग ह डारिन हे डेरा

बलौदाबाजार. जिले के दतान (खैरा) गांव म दूषित पानी पीये ले 50 ले अधिक लइका मन बीमार हो गे हे। जेमा 25 लइका के इलाज ह पलारी के सामुदायिक स्वास्थ्य केंद्र म चलत हे। स्वास्थ्य विभाग के टीम ह प्रभावित गांव म स्वास्थ्य जांच शिविर लगाय हे, अउ पीड़ित मन ल दवाई के संग पानी ल शुद्ध करे बर गोली घलो बांटिन हे। संग म दूषित जल स्रोत ले पानी नई भरे के सलाह घलो देवत हे। उंहे अधिकारी मन ह स्थानीय प्रसासन ल शुद्ध पानी के बेवस्था करे बर केहे हे। स्वास्थ्य जांच शिविर म इलाज करइया डॉ. एफआर निराला ह बतइन हंवय कि दतान गांव म जेन बोरिंग ले दूषित जल निकलत हे वोला सील कर दे गे हे अउ ओखर पानी के सैंपल ल जांच बर पीएचई विभाग भेजे गे हे। सबो गंभीर रूप ले बीमार लइका मन के इलाज पलारी स्वास्थ्य केन्द्र म चलत हे।