….. आखिर रमेश बैस के जुबान म आ गे हे सच्चाई

रायपुर। छत्तीसगढ़ विधानसभा चुनाव म बीजेपी ल मिले करारी हार के बाद पार्टी म मचे घमासान थमे के नाम नइ लेवत हे।  अउ बीजेपी के अंदर मचे कलहा धीरे-धीरे  बाहिर निकल के आवत हे। सुरुआत ननकीराम कवर, कद्दावर मंत्री ब्रजमोहन अग्रवाल अउ बीजेपी प्रदेस अध्यक्ष धरमलाल कौशिक के बाद अब रायपुर लोकसभा के बीजेपी सांसद रमेश बैस के जुबान म सच्चाई आघू आइस हे।

बीजेपी म हार के बाद कार्यकर्ता अउ नेता मन के जुबान मन खुलत जात हे। अब रायपुर बीजेपी सांसद रमेश बैस ह बेयान देके पार्टी म नवां घमासान छेड़ दिस हे।  सांसद  बैस ह कहिन के रमन सरकार म योजना मन ल लेके कार्यकर्ता का नेता मन ले घलोक नइ पूछे  जात हे, केवल सरकार योजना बनात रहिस हे. ओला सबला पालन करना पड़त रहिस हे।  योजना के सुरू होवय अउ क्रियान्यवयन ल लेके कहिन के  कोनो भी योजना बर  कोनो ले  नइ पूछे जात रहिस  हे।

अतना ही नइ सांसद इहां नइ रुकिन, उमन कहिन के,  कार्यकर्ता पार्टी ले नइ बल्कि कुछु व्यक्ती मन ले नाराज रहिन हे। सांसद ह नाराज व्यक्ति मन के नाम के त खुलासा नइ करिस, लेकिन एक इसारा करत हुए निकलगे। बता दन के, भाजपा के प्रदेस अध्यक्ष धरमलाल कौशिक ह एक बेयान म कहे रहिस हे के, कार्यकर्ता खुलके काम नइ करिन, एखर सेती पार्टी ल विधानसभा चुनाव म कारारी हार के सामना करना पड़िस। बहरहाल बीजेपी म मचे घमासान के अंत होत नजर नइ आवत हे।  रहि-रहिके बीजेपी के अंदर के कलहा निकल के आघू आना सुरू हो गेहे।