मुंगेली. सिरिफ पांच सौ रुपिया के लेनदेन ह काखरो हत्या के कारण बन सकथे ए बात सुने म जरूर अचरज लागथे फेर मुंगेली जिला के सिटी कोतवाली थाना इलाका म अईसने एक घटना सामने आए हे। भटगांव म सिरिफ 500 रुपिया ले लेन-देन एक पंच के मऊत के कारण बन गे।
आरोपी अशोक यादव ह 500 रुपिया के ब्याज ल जोड़के 10 हजार रुपए के मांग अक्सर मृतक पंच कुंवारू साहू ले करे, ऐला ले के विवाद घलो होए। बाताए जात हे कि आरोपी ह पहिली घलो पंच ल जान ले मारे के धमकी दे चुके हे। मंगलवार के एक घांव अऊ इही बात ल लेके विवाद बढ़ गे अऊ आरोपी ल पंच उपर धारदार हथियार ले हमला कर दिस। ए हमला ले पंच के मऊत हो गे। घटना के बेरा मृतक पंच कुंवारु साहू गांव म छेरी चराए बर गे रिहित तभे उहां आरोपी अशोक ह पहुंच गे। अऊ ए घटना ल अंजाम दे दिस।
बताए जात हे कि कुछ बछर पहिली आरोपी ह मृतक ल 500 रुपिया के उधारी दे रिहिस जेखर ब्याज सहित 10 हजार रुपिया के मांग आरोपी ह करे। बहरहाल पुलिस आरोपी ल हिरासत म लेके मामला के विवेचना शुरू कर दे हे। उहें मृतक के शव पोस्टमार्टम बर भेजे गिस। पीएम रिपोर्ट के इंतजार करे जात हे।
Other Articles
कटोरा तालाब म मछरी मन के जीव के काल, अपने-अपन मरत हे.. बदबू ले परेशान रहवासी
