अनाज बेपारी ल गला रेत के मार डारिन, घटनास्थल म मिलिस संदिग्ध मोबाइल
मुंगेली. सिटी कोतवाली थाना इलाका पड़ाव चौक के सारथी मुहल्ला म आज बिहनिया कन एक बुजुर्ग अनाज बेपारी धींगड़मल जैन ल धारदार हथियार ले गला रेत के मार डारिन। बिहनिया-बिहनिया बीच मार्केट म बेपारी के हत्या होय ले आसपास के इलाका म दशहत के माहोल हे अउ लोगन मन सहम गे हे। मृतक ह मुंगेली जिला के चेंबर ऑफ कॉमर्स के पूर्व अध्यक्ष भैरुदान छाजेड़ के चाचा ये।
अइसन जानकारी मिले हवय कि धींगड़मल जैन ह बिहनिया कचरा फेके बर घर ले बाहिर निकलीस तभे आरोपी मन ह उंखर ऊपर मिरचा पउडर ल फेंकिस हे, तेखर बाद धारदार हथियार ले ओखर गला रेत के मउत के घाट उतार दिस। घटना ल आरोपी मन ह घर ले बाहिर अंजाम दिस हे अउ फरार हो गे। ये वारदात म एक ले जादा आरोपी मन के होए के आशंका जतात हे। उंहे घटनास्थल म आरोपी के संदिग्ध मोबाइल बरामद करे गे। घटना के गंभीरता ल देख के एसपी सीडी टण्डन, एएसपी एलपी पटेल, थाना प्रभारी तेजराम पटेल, एसडीओपी फॉरेंसिक एक्सपर्ट मौका म पहुंच के जांच म जुट गे हे।
