नगर पंचायत अध्यक्ष उपर जानलेवा हमला करइया दू आरोपी 5 बछर बाद चढ़िस पुलिस के हत्थे

कांकेर। नगर पंचायत अध्यक्ष अशीम राय ल 2014 म गोली मार के हत्या करे के परयास करइया दू झन आरोपी ल पखांजूर पुलिस ह गिरफ्तार करे हे। बता देथन कि 2014 म  नगर पंचायत अध्यक्ष अशीम राय उपर भगत सिंह चौक म दो अज्ञात मोटरसाइकिल सवार मन ह गोली मार के हत्या करे के परयास करे रहिस। घटना के बाद ले पुलिस ह लगातार संदिग्ध मन के तलाश म जुटे रिहिस हे।

अब पांच बछर बाद पुलिस ल ये मामला म कामयाबी मिले हे। ये मामला म रिपन संधियाल, नरेश घोष ल गिरफ्तार करे हे। दूनो झन आरोपी मन अपन गुनाह ल कबूल करे हे। आरोपी रिपन संधियाल ह बतइस कि अशीम राय ह मोर माँ ले जमीन ल लेके आए दिन झगडा करत रहिस अउ जमीन ल हथियाना चाहत रिहिस। ऐखर बदला ले बर आरोपी नरेश घोष के संग मिल के घटना ल अंजाम दिस। आरोपी मन ल पुलिस ह गिरफ्तार कर न्यायालय म पेश करिस।