“हमर पारा तुंहर पारा“ गीत ले मिलिस नाम अऊ पहचान.. अब सुनील करत हे एक्टिंग म धमाल

जय जोहार. सुनील मानिकपुरी ल छत्तीसगढ़ी गीत “हमर पारा तुंहर पारा“ ह रातों-रात स्टार बना दे रिहिस। ए गीत म अपन आवाज दे रिहिस हे सुनील ह अऊ ए गीत छत्तीसगढ़ी गीत प्रेमी मन के जुबान पर चढ़ गे। कोरिया जिला के चिरमिरी म रहवईया सुनील अब एक्टिंग म अपन जलवा दिखावत हे।

सुनील बताथे कि ओहा पहिली डांसर रिहिस अऊ दूसर मन संग छोटे-छोटे टीम संग डांस करे। इही दउरान सुनील ह चार साल संगीत के शिक्षा घलो लिस अऊ खुदे एक गीत के रचना कर लिस। इही चार साल के शिक्षा के परिणाम निकल के अईस त छत्तीसगढ़ म धाक जमईया गीत गीत “हमर पारा तुंहर पारा“ के रिकार्डिंग घलो हो गे। अब इही ल कथे किस्मत अऊ सुनील ह रातों-रात स्टार बन गे।

सुनील ह खुद के एक संस्था घलो चलाथे। जेमा ओ ह अपन कलाकर मन संग स्टेज प्रोग्राम करथे। सुनील मानिकपुरी एक सुदूर अंचल चिरमिरी जिला कोरिया के रहवईया ए। आज के फिल्मी दुनिया अऊ चकाचौंध म लोगन मन अपन पहचान बनाए बर जद्दोजहद करत रहिथे वईसे म एक गांव के लईका के लगन ह ओला छत्तीसगढ़ में बिसेस पहचान दिला दिस।

जम्मो छत्तीसगढ़ी फिलिम के पसंद करईया लोगन के दिल म छा चुके सुनील ह एक मल्टी टैलेंटेड कलाकार हे। ओखर अंदर बहुत सारा गुण भरे हे। इही वजह के कि सुर के धनी सुनील ह एक सिंगर सा संगे-संग सुग्घर गीतकार घलो हे। अपन जम्मो गीत ल खुदे लिखथे अऊ डांस घलो करथे।

सुनील के एक अऊ नवा रूप तब लोगन मन के सामने आईस जब ओहा सुपर डुपर छत्तीसगढ़ी हिट फिलिम “आई लव यू“ म बतौर खलनायक बड़े परदा म नजर आईस। सुंदरानी प्रोडक्शन के बैनर तले बने ऐ फिलिम म ओहा कोनों भी स्थापित बड़े खलनायक ल पीछे छोड़ दे रिहिन। ए रोल ले सुनील ह इंड्रस्ट्री म जाने माने खलनायक मन के बीच म अपन नवा मुकाम बनईस।

फिलिम म राकेश के रुप म सुनील के खलनायकली ल बेहत पसंद करे गिस। इही फिलिम ह साबित कर दिस कि सिंगर अऊ गीतकार के अंदर छिपे एक अदाकार घलो छिपे हे। सुनील आज गायकी के संगे-संग कई फिलिम म अलग-अलग भूमिका म नजर आही।

सुनील ह कहिथे कि फिलिम मोर बर जरूरी हे काबर कि इही फिलिम ले दर्शक मन के बीच म पहचान बनथे। हालांकि मोर पहिली प्राथमिकता स्टेज हरे। उही स्टेज जेन ह मोला नाम अऊ पहचान दिलाईस। सुनील ह कहिथे कि फिलिम के संगे-संग स्टेज परफारमेंस घलो में हर करत रहुं।

सुनील के जीवन के एक अऊ कड़ी हे ओ हरे समाज बर योगदान। सुनील समाज बर बहुत काम करथे जेमा ओ ह गरीब लईका मन ल निशुल्क छत्तीसगढ़ी गीत के शिक्षा देवत हे। सुनील के कला अऊ समाज बर योगदान के बदोलत ओला कई सम्मान घलो मिले हे। फिलहाल सुनील ह हाल म स्टेज प्रोग्राम अऊ अपन अवईया फिलिम के शूटिंग म व्यस्त हे।