भजन संध्या म बाबा हंसराज रघुवंशी अउ लखबीर सिंह लक्खा के होही प्रस्तुति
जय जोहार । छत्तीसगढ़ म पहली घांव आयोजित करे जावत ‘राष्ट्रीय रामायण महोत्सव’ के दूसर दिन ख्यातिप्राप्त राष्ट्रीय कलाकार बाबा हंसराज रघुवंशी अउ लखबीर सिंह लक्खा ह भजन के प्रस्तुति दिही । गौरतलब हे कि 01 से 3 जून तक रायगढ़ के ऐतिहासिक रामलीला मैदान म आयोजित करे जावत ए महोत्सवम रामायण के अरण्य काण्ड म रामायण दल मन के प्रतियोगिता प्रतिदिन आयोजित होवत हे । छत्तीसगढ़ के लोक गायक दिलीप षड़ंगी ह अपन टीम के संग महोत्सव म प्रतिदिन हनुमान चालीसा के पाठ करही । एखर संग ही साथ प्रतिदिन रात्रि म भजन संध्या के आयोजन करे जाही, जेमा देस के सुप्रसिद्ध कलाकार ह अपन प्रस्तुति दिही ।
राष्ट्रीय रामायण महोत्सव के दूसर दिन के मंचीय कार्यक्रम मंझनिया 2 बजे ले प्रारंभ होही , संस्कृति मंत्री अमरजीत भगत ह कार्यक्रम के मुख्य अतिथि होही अउ स्कूल शिक्षा मंत्री डॉ. प्रेमसाय सिंह टेकाम कार्यक्रम के अध्यक्षता करही । कार्यक्रम म मंझनिया 2.15 बजे हनुमान चालीसा के सामूहिक पाठ होही अउ मंझनिया 2.30 ले रात्रि 8.30 बजे तक आयोजित अरण्यकाण्ड म आधारित प्रतियोगिता म 8 राज्य झारखण्ड, महाराष्ट्र, मध्यप्रदेश, असम, ओड़िसा, हिमाचल प्रदेश, गोवा अउ छत्तीसगढ़ के दल हिस्सा लिही । भजन संध्या म रात्रि 8.30 बजे ले 9.30 बजे तक ख्यातिप्राप्त राष्ट्रीय कलाकार बाबा हंसराज रघुवंशी अउ रात्रि 9.30 बजे ले 10.30 बजे तक लखबीर सिंह लक्खा भजन के प्रस्तुति दिही ।
महोत्सव के तीसर दिन आकर्षण इंडोनेशिया के रामायण दल के प्रस्तुति होही । ए रामायण दल के प्रस्तुति म सर्वव्यापी भगवान श्रीराम के रामकथा के विविधतापूर्ण राष्ट्रीय-वैश्विक स्वरूपों के झलक देखे ल मिलही । संग ही राष्ट्रीय स्तर म ख्याति प्राप्त कलाकार ह भजन संध्या म अपन संगीतमय प्रस्तुति दिही । रामलीला मैदान म रामकथा के अविरल भावधारा बही । राष्ट्रीय रामायण महोत्सव के अंतिम दिन हिन्दी के प्रख्यात कवि कुमार विश्वास अपन विशेष प्रस्तुति ‘अपने-अपने राम म्युजिक नाईट’ ले भगवान श्रीराम के महिमा के बखान करही ।
No Comment! Be the first one.