रासन के मांग करत हे नक्सली मन

रायपुर/ सुकमा। तीन दसक ले नक्सल हिंसा ले जूझत बस्तर म नक्सली अब बैकफुट म नजर आवत हे। हालत ये हे के बस्तर के घनघोर जंगल मन म नक्सली चावल दाल समेत अन्य सामग्री मन बर तरसत हवय। बस्तर के सुकमा म पीछु के 10 जुलाई के होय सुरक्षा बल अउ नक्सली मन के बीच होय मुठभेड़ के बाद पुलिस ह येकर दावा करत हे। पुलिस के दावा हे के सुकमा म मुठभेड़ के बाद उमन ल एक खत मिले हे, जेमा नक्सली अपन आला पदाधिकारी मन ले रासन के मांग करत हवय।
बस्तर के सुकमा जिला के मिनपा म सुरक्षा बल अउ नक्सली मन के बीच मुठभेड़ होय रिहिस हे। ये मुठभेड़ के बाद सुरक्षा बल के जवान मन ह हथियार समेत कई नक्सली दस्तावेज अउ सामग्री जब्त करे दावा करे रिहिस हे। पुलिस के कहिना हे के घटना स्थल ले
एक खत बरामद होइस हे, जेमा नक्सली लीडर सीतू बटालियन डिप्टी कमांडर ह एरिया कमांडर ल ये बतात हवय के उंखर पास रासन लगभग खत्म हो चुके हे अउ उमन ल येकर जरुरत हे। लेटर म जल्द ले जल्द रासन भिजवाय के बात कहे गेहे। एसपी अभिषेक मीणा ह घलो मुठभेड़ के बाद मीडिया ले चरचा के दउरान पत्र मिले के बात कहे रिहिस हे। एसपी के मुताबिक बस्तर म नक्सला मन के सप्लाई नेवटर्क ल सुरक्षा बल मन ह बहुत हद तक तोड़ दिय हे।