देखव बिडियो: नक्सली मन के मदद करईया शहरी नेटवर्क के खुलासा

जगदलपुर. शहरी नक्सली नेटवर्क के गिरोह के पर्दाफास करे म छत्तीसगढ़ पुलिस ल बड़े कामयाबी हासिल होए हे। शहरी नेटवर्क ले जुड़े तीन आरोपी घलो पकड़े गे हे।

आरोपी मन ल रविवार के नगरनार क्षेत्र के बकावंड फारेस्ट नाका ले गिरफ्तार करे गे रिहिन जेन ल आज कचहरी म पेश करे गिन। कहे जात हे कि ऐ शहरी नेटवर्क के बहुत बड़े खुलासा हे, काबर कि लोकसभा चुनाव के मउमा मन ओमन बहुत बड़े घटना ल अंजाम दे के फिराक म रिहिन। आईजी, बस्तर विवेकानंद सिन्हा ह बताईन कि मुखबीर से सूचना मिले रिहिस। इही सूचना के आधार म जब टीम बकावंड नाका म जांच करत रिहिन त पिकअप वाहन क्रमांक ओडी 24-9729 अऊ बोलेरो वाहन क्रमांक ओडी-10-ऍफ़-8126 म विस्फोटक पदार्थ मिलिस।

एखर बाद वाहन म बईठे आरोपी मन ल गिरफ्तार करे गिस। गिरफ्तार आरोपी मन के नाव सुबल कुमार चौधरी (51) निवासी नवरंगपुर, नवीन जानी (27) निवासी नवरंगपुर अऊ मनोज तिवारी (49) निवासी आंबेडकर वार्ड, जगदलपुर हे। ओखर मन के कब्जा ले पुलिस ह 10 बंडल कोडेक्स वायर, सेफ्टी रस्सी 30 बंडल अऊ डेटोनेटर 5900 नग जब्त करे हे।