कोरिया । जिला अस्पताल म एक बड़का लापरवाही आघू आईस हे। एक महिला के भालू के हमला म इलाज के दउरान मउत हो गिस हे। महिला के मउत के बाद डॉक्टर मन ह बिना पोस्टमार्टम कराए परिजन मन ल शव सउप दिन।
ए घटना के बाद मृतिका के परिजन शव ल बैकुंठपुर ले अपन घर ले आइन अउ दू दिन बाद खड़गवां थाना म एखर सूचना देय के बाद पुलिस ह खड़गवां सामुदायिक स्वास्थ्य केंद्र म जानकारी दीस। जेखर बाद आज तीसर दिन मृतिका के पोस्टमार्टम कर गिस।
ए मामला खड़गवां विकासखंड के ग्राम बरदर के हे, जिहां 45 साल के महिला सोन कुंवर ऊपर 25 दिसंबर 2018 के भालू ह हमला कर देय रहिस। घायल सोन कुंवर ल खड़गवां के सामुदायिक स्वास्थ्य केंद्र म इलाज बर भर्ती करे गिस। सात दिन बाद सोन कुंवर ल अस्पताल ले छुट्टी दे देय गिस अउ एक इंजेक्सन लगाए बर सात दिन बाद बुलाय गिस।
लगभग एक महीना के बाद अचानक महिला के तबियत बिगड़ गिस त इलाज बर जिला अस्पताल म भर्ती कराय गिस, जिहां इलाज के दउरान महिला सोन कुंवर के मउत 10 फरवरी के हो गिस। जिला अस्पताल म पोस्टमार्टम करे बिना ही परिजन मन ल मृतिका के शव सउप देय गिस। परिजन दू दिन तक शव ल घर म ही रखे रहिन।
एखर बाद घटना के जानकारी खड़गवां पुलिस ल दे गिस। खड़गवां पुलिस ह मामला के गंभीरता ल देखत हुए सामुदायिक स्वास्थ्य केंद्र म एखर जानकारी दीस अउ शव के पोस्टमार्टम करे बर कहिस। जेखर बाद आज तीसर दिन खड़गवां अस्पताल के डॉक्टर ह पोस्टमार्टम करिन। चूंकि भालू के हमला ले महिला के मउत हो रहिस हे, त वन अमला घलो पोस्टमार्टम स्थल म मउजूद रहिस हे।
Other Articles
2 मार्च के प्रदेश स्तरीय बाइक रइली निकालही भाजयुमो
मोदी सरकार के खिलवाड़ ल उजागर करिस राहुल ह
