रायपुर। छत्तीसगढ़ ह एक बार फेर देश म अपन नावं ल रोशन करिस हे। गुरूवार के इंटरनेशनल योग दिवस म जिहां प्रदेश म एक संघरा 1 करोड़ लोगन योग करके गोल्डन बुक म वर्ल्ड रिकॉर्ड बनाइस। उहें स्कॉच समिट 2018 म घलोक नवां इतिहास रचिस। ये समारोह म छत्तीसगढ़ ल सबले स्वच्छ स्टेट के गोल्ड अॅवार्ड के संग अरबन छतीसगढ़ ल स्कॉच के उच्च स्तरीय उत्कृष्टता पुरस्कार 12 ले नवाजे गिस हे। येखर संग ही नगरीय निकाय मन ल रिकार्ड 52 अॅवार्ड प्राप्त होइस हे। ये ह छत्तीसगढ़ बर बड़ उपलब्धि हे। ये ह प्रदेश बर गौरव के बात हे।
ये पुरस्कार 52वें स्कॉच शिखर सम्मेलन म मिलिस हे। ये पुरस्कार ल स्कॉच ग्रुप के अध्यक्ष समीर कोचर ह प्रदेश ल प्रदान करिन। तीन दिवसीय शिखर सम्मेलन म एक हजार ले अधिक प्रतिनिधि पूरा देश म ले भाग लेवत हे। य मा 63 स्मार्ट शहर अउ नगरपालिका मन, 38 जनपद, 28 राज्य अउ केन्द्र शासित प्रदेश, 08 केन्द्रीय मंत्रालय, अर्थशास्त्री, पत्रकार, वैचारिक नेता अउ उद्योग जगत के प्रतिनिधि शिरकत करत हे।
