बस्तर म विकास के नवा कहानी लिखही नगरनार स्टील प्लांट : डॉ. रमन सिंह

जगदलपुर। मुख्यमंत्री डॉ. रमन सिंह के कहिना हे के अवइया समय म बस्तर म खुलत नगरनार स्टील प्लांट बस्तर के विकास के नवा इबातर लिखही। उमन येहू कहिन के नगरनार भविष्य के भिलाई ये। भिलाई आठ सौ के आबादी वाला एक गांव रहिस, जेकर गिनती आज देश के बड़ शहर मन म होथे। इही नगरनार अवइया दस साल बाद भिलाई के जइसे पूरा सहर बनही। कई उद्योग इहां स्थापित होही, जेखर से विकास के रफ्तार बाढ़ही। डॉ. सिंह काली जिला मुख्यालय जगदलपुर के धरमपुरा म आयोजित समारोह ल सम्बोधित करत कहिन।
ए अवसर म आदिम जाति कल्याण मंत्री केदार कश्यप, वन मंत्री महेश गागड़ा, सांसद दिनेश कश्यप, जगदलपुर विधायक संतोष बाफना, युवा आयोग के अध्यक्ष कमलचंद भंजदेव, वन विकास निगम के अध्यक्ष श्रीनिवास राव मद्दी, जिला पंचायत अध्यक्ष श्रीमती जबिता मंडावी, जगदलपुर नगर निगम के सभापति शेषनारायण तिवारी, मुरिया समाज के अध्यक्ष मुरलीधर बघेल, बैदूराम कश्यप, लच्छूराम कश्यप, डॉ. सुभाऊ कश्यप, किरणदेव, बड़ संख्या म मुरिया समाज के मनखे अउर ग्रामीणजन उपस्थित रहिन।