नवनियुक्त भाजपा प्रदेशाध्यक्ष विष्णुदेव साय ह काली करही पदभार ग्रहण, एकात्म परिसर म होही कार्यक्रम

जय जोहार…. भाजपा के नवनियुक्त प्रदेश अध्यक्ष विष्णुदेव साय ह सनिच्चर 6 जून के पदभार ग्रहण करही। भाजपा मीडिया सेल के तरफ ले दे गे जानकारी के मुताबिक विष्णुदेव साय ह सनिच्चर बिहनिया अपन गृह क्षेत्र जशपुर ले प्रस्थान कर राजधानी रायपुर के भाजपा कार्यालय एकात्म परिसर पहुंचही। इहां दोपहर एक बजे भाजपा नेता अऊ कार्यकर्ता मन के तरफ ले ओखर स्वागत करे जाही। एखर बाद वे प्रदेश अध्यक्ष के पदभार ग्रहण करही।

भाजपा मीडिया विभाग के तरफ ले केहे गे हे कि कोरोना संकट के सेति सावधानी ल धियान म रखत हुये सीमित संख्या म कार्यकर्ता अऊ वरिष्ठ नेता मन ल आमंत्रित करे गे हे। प्रदेश भर म कार्यकर्ता मन म उत्साह अऊ जोश हे। अइसे म सब्बो कार्यकर्ता ह भाजपा प्रदेश अध्यक्ष के स्वागत ल करना चाहत हे।

लेकिन पार्टी के निर्देश अऊ केंद्र सरकार के नियम ल पालन करत हुये सीमित कार्यकर्ता मन के बीच नवनियुक्त प्रदेश अध्यक्ष के स्वागत अऊ पदभार ग्रहण के कार्यक्रम होही। स्वागत अऊ पदभार ग्रहण करे के बाद दोपहर तीन बजे विष्णुदेव साय ह प्रेस कांफ्रेंस म पत्रकार मन ले चर्चा करही।