Raipur : नीति आयोग के रिपोर्ट होगे जारी : देस के आकांक्षी जिला म छत्तीसगढ़ के नारायणपुर जिला ल मिले हे चौथइया स्थान
जय जोहार। (Raipur) भारत सरकार के नीति आयोग डहार ले आकांक्षी जिला ल लेके रिपोर्ट ल जारी करे जात हे । ए कड़ी म दिसम्बर 2022 बर जारी करे गे चैम्पियन ऑफ चेंज डेल्टा रैंकिंग म छत्तीसगढ़ के नारायणपुर जिला के परफॉर्मेंस बेहतर रिहीन हे । देस म घोसित 112 आकांक्षी जिला म ले ओवरऑल परफॉर्मेंस श्रेणी म सेबल ऊपर पांच जिला म छत्तीसगढ़ के आकांक्षी जिला म सामिल नारायणपुर जिला चौथइया स्थान म हे । उंहे स्वास्थ्य अउ पोसण श्रेणी म नारायणपुर जिला के स्थान तीसरइया हे ।
गौरतलब हे कि मुख्यमंत्री भूपेश बघेल के नेतृत्व म छत्तीसगढ़ म बीते चार बछर के भीतर स्वास्थ्य अउ पोसण समेत विभिन्न क्षेत्र म उल्लेखनीय काम करे गेहे । छत्तीसगढ़ म होए ए परयास ल भारत सरकार ह घलो कई घांव सराहीन हे । मुख्यमंत्री श्री बघेल ह लईका मन म कुपोसण ल दूर करे अउ किशोरी बालिकाओं अउ महिला मन ल एनिमिया ले मुक्त करे बर मुख्यमंत्री सुपोसण अभियान चलाइन हे । छत्तीसगढ़ सरकार के परयास ले पोसण के क्षेत्र म सकारात्मक परिणाम घलो सामने आए हे।
स्वास्थ्य के क्षेत्र म मुख्यमंत्री हाट बाजार क्लिनिक, दाई-दीदी क्लिनिक, मुख्यमंत्री स्लम स्वास्थ्य योजना, हमर लैब, मलेरिया मुक्त बस्तर अउ मलेरिया मुक्त छत्तीसगढ़ योजना के संचालन करे के संग ही छत्तीसगढ़ म मनखे मन ल डॉ. खूबचंद बघेल स्वास्थ्य योजना, मुख्यमंत्री विशेष स्वास्थ्य योजना के अंतर्गत स्वास्थ्य संबंधी लाभ पहुंचाए जावत हे।
