जय जोहार। गरीब परिवार म जन्म लेवइया बेटी मन बर नोनी सुरक्षा योजना ह बड़का सहारा बनत हे । एखर ले परिवार के बेटी मन के भविष्य ल लेके चिंता दूर होए हे । ए योजना के तहत गरीब परिवार के बेटी मन ल 18 बछर पूरा होए अउ 12वीं उत्तीर्ण होए म एक लाख रुपिया प्रदान करे जात हे । एखर बर जीवन बीमा निगम अउ महिला एवं बाल विकास विभाग के मध्य अनुबंध करे गेहे ।
नोनी सुरक्षा योजना के तहत राज्य सरकार डहार ले गरीब परिवार के पंजीकृत बालिका के नाव म भारतीय जीवन बीमा निगम म 5 बछर तक हरेक बक्र 5 हजार रुपिया अर्थात कुल 25 हजार रुपिया जमा करे जात हे । अब तक भारतीय जीवन बीमा निगम म कुल 122.64 करोड़ के रासि कॉरपस फंड म विनियोजित करे गेहे । नोनी सुरक्षा योजना अंतर्गत अब तक 84 हजार 594 बालिका मन के पंजीकरण करे गेहे ।
जनगणना बछर 2001 के आंकड़ा के अनुसार छत्तीसगढ़ म बाल लिंगानुपात प्रति हजार 975 रिहीस जेन जनगणना बछर 2011 म घटके एक हजार के अनुपात म 969 हो गीस । अइसने राज्य म घटत बाल लिंगानुपात अउ बालिका मन के प्रति समाज म सकारात्मक सोच बढ़ाए बर 1 अप्रैल 2014 ले ’’नोनी सुरक्षा योजना’’ लागू करे गीस । ए योजना के मुख्य उद्देश्य प्रदेस म बालिका मन के सैक्षणिक अउ स्वास्थ्य के स्थिति म सुधार लाना, बालिका मन के अच्छा भविष्य के आधारसिला रखना, बालिका भ्रूण हत्या ल रोकना अउ बालिका मन के जन्म के प्रति समाज म सकारात्मक सोच लाना अउ बाल विवाह के रोकथाम करना हे ।
छत्तीसगढ़ राज्य के मूल निवासी अउ गरीबी रेखा के नीचे जीवन यापन करइया परिवार के 1 अप्रैल 2014 के बाद जन्मे जादा तम दू झन बालिका मन ल योजना के तहत लाभ मिलत हे । ए योजना के सुरू होए ले सहरी क्षेत्र के गरीब परिवार के संग दूरस्थ आदिवासी क्षेत्र म बसे परिवार म घलो बेटी मन के भविष्य के चिंता दूर होए हे । ए योजना के लाभ ले बर जिला स्तर पर जिला कार्यक्रम अधिकारी, जिला महिला अउ बाल विकास अधिकारी अउ विकासखण्ड स्तर म बाल विकास परियोजना अधिकारी ले संपर्क करे जा सकत हे ।
No Comment! Be the first one.