लोकसभा चुनाव के पहिली चरन बर अधिसूचना आज हो ही जारी

प्रदेश के बस्तर लोकसभा क्षेत्र बर सोमवार ले होही नामांकन दाखिल
रायपुर. लोकसभा निर्वाचन के पहिली चरन बर सोमवार 18 मार्च 2019 ले अधिसूचना जारी होवत हे. छत्तीसगढ़ म लोकसभा बर तीन चरन म मतदान होही। मुख्य निर्वाचन पदाधिकारी सुब्रत साहू ह बताइस के अधिसूचना जारी होए के संगेच पहिली चरन म प्रदेस के बस्तर लोकसभा क्षेत्र बर नामांकन दाखिल करे के प्रक्रिया सुरू हो जाही.

पहिली चरन बर प्रत्यासी अपन नामांकन पत्र सासकीय छुट्टी ल छोड़के काम के दिन म बिहनिया 11 बजे ले मझनियां 3 बजे तक 25 मार्च 2019 तारीक तक दाखिल कर सकत हे. 26 मार्च ले नामांकन पत्र के जांच होही। फारम भरईया मन 28 मार्च तक नामांकन पत्र वापस ले सकत हें. ए चरन म प्रदेस के 5 जिला के 8 विधानसभा क्षेत्र मन के मतदाता 11 अपरेल 2019 के दिन मतदान करहीं.

श्री साहू ह बताइस के पहिली चरन के मतदान बर जम्मो तइयारी हो गए हे. बस्तर लोकसभा क्षेत्र के 13 लाख 61 हजार 146 मतदाता अपन मताधिकार के परयोग कर सकहीं. इहां कुल मतदाता मन म 7 लाख 12 हजार 259 महिला, 6 लाख 59 हजार 824 पुरुष अउ 49 तीसरी लिंग के मतदाता हें. सत-प्रतिसत मतदान सुनिश्चित करे बर 1878 मतदान केन्द्र बनाय गए हे.

लोकसभा निर्वाचन के दूसर चरन बर 19 मार्च 2019 मंगलवार के दिन अधिसूचना जारी करे जाही. ए चरन म प्रदेश के कांकेर, महासमुंद अउ राजनांदगाँव लोकसभा क्षेत्र मन बर 18 अपरेल के दिन मतदान होही. उंहें तीसर चरन बर 28 मार्च के दिन अधिसूचना जारी करे जाही. ए चरन म छत्तीससगढ़ के बांचे सबो सात सीट बर मतदान 23 अपरेल के दिन होही। प्रदेस के रायपुर, बिलासपुर, रायगगढ़, कोरबा, जाँजगीर, दुर्ग अउ सरगुजा लोकसभा क्षेत्र मन बर तीसर चरन म मतदान होही.