अब बस्तर में होही उजियारा… हर गांव गवई हर घर म बिजली : रमन

कांकेर। मुख्यमंत्री डॉ. रमन सिंह कांकेर जिला के अंतागढ़ म आयोजित आमसभा ल संबोधित करत हुए कहिन कि बस्तर म अब उजियारा हो ही। हर गांव, मजरा-टोला अउ हर घर म बिजली पहुंचाए जात हे। अब इहां अंधियारा नइ होवय । उमन कहिन कि बस्तर म रोड कनेक्टिविटी, बिजली अउ इंटरनेट कनेक्टिविटी बढ़ाए जात हे। बस्तर ह अब एयर कनेक्टिविटी ले धलोक जुड़त हवय। रेल कनेक्टिविटी घलो बढ़ाए जाही। भानुप्रतापपुर तक रेल पहुंच गेहे, बरिस 2019 के आखरी म अंतागढ़ तक घलोक रेल पहुंच जाही।
छत्तीसगढ़ के मुख्यमंत्री रमन सिंह के विकास यात्रा ह आज कांकेर जिला पहुंचिस। सीएम ह अंतागढ़ म आयोजित आमसभा म 60 करोड़ 43 लाख रुपिया के लागत ले 125 कारज मन के लोकारपन अउ भूइंया पूजन करिन हे। जेमा तीन करोड़ रुपिया के लागत के 18 कारज के लोकरपन अउ 57 करोड़ 38 लाख रुपिया के लागत ले 107 कारज के भूइयां अउ सिलान्यास हवय।
आम सभा ल लोक सभा सांसद विक्रम उसेंडी अउ विधायक भोजराज नाग घलोक संबोधित करिन हे। ये बखत वन मंत्री एवं कांकेर जिला के प्रभारी मंत्री महेश गागड़ा, आदिम जाति कल्याण मंत्री केदार कश्यप, जिला पंचायत अध्यक्ष सुभद्रा सलाम, मंतुराम कश्यप, कमिश्नर दिलीप वासनीकर, आईजी विवेकानंद, कलेक्टर टामन सिंह सोनवानी, एसपी केएल ध्रुव समेत जनप्रतिनिधि, अधिकारी-कर्मचारी अउ बड़ संख्या म ग्रामीण दाजिर रहिन हे।