एनएसयूआई ह रमन सिंह अउ भाजपा सांसद के निवास के करिन घेराव

जय जोहार…. केन्द्र सरकार के गरीब कल्याण रोजगार योजना म छत्तीसगढ़ के कोनो जिला ल शामिल नई करे हे, ए फइसला के खिलाफ आज प्रदेश एनएसयूआई ह पूर्व मुख्यमंत्री डॉ. रमन सिंह के निवास के घेराव करे हे।

संगेसंग भाजपा सांसद मन के निवास के घलो घेराव करिन अउ छत्तीसगढ़ के सब्बो जिला ल ए योजना म शामिल करे जाय के मांग करिन।
प्रदेश अध्यक्ष आकाश शर्मा ह कहिन कि आज भारतीय जनता पार्टी ह पूरा प्रदेश म रोजगार के नाम म प्रदर्शन करत हे। ऊहचे भाजपा के राष्ट्रीय नेतृत्व जेन सरकार म काबिज हे,

वे लोग छत्तीसगढ़ के जनता के संग भेदभाव करत हे। क्योंकि छ्त्तीसगढ़ म कांग्रेस के सरकार हे। एला देखत हुये वे लोग ह छत्तीसगढ़ के संग दोहरी नीति ल अपनावत हे।
प्रदेश म 40 प्रतिशत ले जियादा लोगन मन ह गरीबी रेखा के नीचे हे, ओखर बाद घलो प्रदेश ल ए योजना के लाभ नई दे गे हे।

आज ह मन ह केन्द्र सरकार ले मांग करत हन कि छत्तीसगढ़ के सब्बो जिला ल ए गरीब कल्याण रोजगार योजना म शामिल करे जाये। एखर खाती आज ह मन ह भाजपा के 9 सांसद अउ पूर्व मुख्यमंत्री रमन सिंह के निवास के घेराव करिन।