एनटीपीसी ह रायगढ़ मेडिकल कॉलेज के नवीनीकरण बर दिही 25 करोड़ रूपिया अउ भूविस्थापित बर निकालही 79 पद
रायपुर। एनटीपीसी ह रायगढ़ मेडिकल कॉलेज के नवीनीकरण बर 25 करोड़ रूपिया दिही। 69 पद म भूविस्थापित मन के भरती करही। ये जानकारी मुख्यमंत्री भूपेश बघेल ल एनटीपीसी के क्षेत्रीय कार्यपालक निदेशक (पश्चिम-2) नीरज कुमार सिन्हा ह दिस हे।
मुख्यमंत्री बघेल ले ओखर निवास म एनटीपीसी के क्षेत्रीय कार्यपालक निदेशक सिन्हा ह मुलाकात करिस। ये दउरान एनटीपीसी के अधिकारी मन ह बताईस कि पाछू के बईठक म लिए निर्णय के अनुसार जेन विज्ञापन आईटीआई अउ अन्य खाली पद बर अखिल भारतीय स्तर पर निकाले गे रहिस, ओमा संशोधन कर मुख्यमंत्री के निर्देशानुसार 69 पद अब केवल भूविस्थापित मन बर निकाले जाही। संग म 10 अउ पद डिप्लोमा धारक बर निकालही। सबो ल मिलाके 79 पद ल भूविस्थापितों के पात्रता अउ योग्यता के अनुसार भरे जाही। अगर कुछ पद पात्रता अउ योग्यता के वजह ले खाली रही जाथे त ओला छत्तीसगढ़ के ही अभ्यर्थी बर निकाल के नियुक्ति करे जाही।
अधिकारी मन ह बताईस कि एनटीपीसी ह रायगढ़ जिले के पुसौर आईटीआई केंद्र के नवीनीकरण करवावत हे। अवईया सितंबर महिना म एखर उद्घाटन कराए बर मुख्यमंत्री ले समय मांगे हे। मुख्यमंत्री ह एनटीपीसी लारा परियोजना ल जल्दी चालू करे के निरदेश दिस हे। संग म ओहर एनटीपीसी अधिकारी मन ल प्रशासन द्वारा हरसंभव सहयोग प्रदान करे के आश्वासन घलोक दिस हे। इही मौका म मुख्यमंत्री के प्रमुख सचिव गौरव द्विवेदी, छत्तीसगढ़ राज्य विद्युत निगम के अध्यक्ष शैलेन्द्र कुमार शुक्ल, एनटीपीसी के कार्यकारी निदेशक (लारा) संजय मदान, मुख्य महाप्रबंधक मानव संसाधन (पश्चिम क्षेत्र-1 एवं 2) ए.के. झा मौजूद रिहिस हे।
