राजिम कुंभ के नाव बदले म भड़कगे बृजमोहन ह

रायपुर : छत्तीसगढ़ विधानसभा के कार्यवाही गुरुवार तक बर स्थगित कर दे गिस। सदन म पूर्व संस्कृति मंत्री अउ बीजेपी विधायक बृजमोहन अग्रवाल ह राजिम कुंभ के नाव बदले म आपत्ति जताईस अउ सरकार ले सवाल पूछिस।

पूर्व संस्कृति मंत्री बृजमोहन अग्रवाल ह पूछिस, ‘राजिम कुंभ ल बंद करे अउ नाव बदले के फइसला का लेय गिस.’ उमन कहिन के, ‘राजिम के धार्मिक महत्व ल देखत हुए एला प्रयागराज के नाम दे गे रहिस हे।’ बृजमोहन अग्रवाल ह कहिन के, ‘ए प्रदेस म लगइया दूसर पून्नी मेला ले अलग हे अउ आप मन ल राजिम कुंभ नाव ले का दिक्कत हे। ‘

पर्यटन मंत्री ह दिस जवाब

एमा पर्यटन मंत्री ताम्रध्वज साहू ह कहिन, कुंभ ल बंद नइ करे गे हे बल्कि नाव बदल के माघी पुन्नी मेला करे गिस हे। एमा अग्रवाल ह फेर सवाल उठाइस के, माघी पुन्नी मेला अउ कतना स्थान मन म लगत हे। जेमा मंत्री ह अलग ले जानकारी उपलब्ध कराए के बात कहिन।

उहें राजिम विधायक अमितेश शुक्ल ह घलो कहिन, ए कुंभ ल शंकराचार्य ह मान्यता नइ दे हे। पर्यटन मंत्री ह कहिन, रायपुर जिला गजेटियर म पुन्नी मेला के जिक्र हे. लेकिन बृजमोहन अग्रवाल ह फेर कहिन, कुंभ के नाव बदल के मेला के महत्व कम कर देय गे हे।

एखर अलावा सदन म जांजगीर जेल म कइदी के मउत के मामला घलो गूंजिस। जेसीसीजे विधायक अजीत जोगी ह मरवाही म विकास के मुद्दा उठाइन।