सुशासन तिहार म मनखे मन के मांग ऊपर तांदुला जलाशय ले नदी अऊ नहर म छोड़े गीस पानी
कड़ा घाम अऊ पीये के पानी के समसिया ला देखत सुशासन तिहार के बेरा म मनखे मन के मांग ऊपर तुरते कारवाही करत बालोद जिला प्रशासन ह तांदुला जलाशय ले नदी अऊ कचार के नहर म पानी छोड़ना सुरु कर दीस हे। एकर ले ग्राम गुरेदा अऊ आघू-पाछू के कतको मनखे मन ला निस्तारी के समसिया ले बड़े राहत मिलही।
जानबा होवय के पाछू 18 मई 2026 ला ग्राम गुरेदा म सुशासन तिहार के तहत जनसमस्या निवारण सिबिर रखाय रीहिस। ए कार्यक्रम म ग्राम गुरेदा के संग आघू-पाछू के कतको गांव के मनखे मन भारी संखा म पहुंचे रीहिन। मनखे मन ह कड़ा घाम के सेती होवत पानी के किल्लत ला बतावत तांदुला नदी म पानी छोड़े बर अरजी (आवेदन) देविन। मनखे मन के समसिया के तुरते निपटारा बर दुर्ग संभाग के आयुक्त सत्यनारायण राठौर अऊ कलेक्टर दिव्या उमेश मिश्रा ह मया-दया देखावत ओही मौका म जल संसाधन बिभाग के अधिकारी ला तांदुला जलाशय ले पानी छोड़े के निरदेस दरीश, ताकि मनखे मन ला ए कड़ा घाम म निस्तार अऊ पानी मिल सके।
जल संसाधन बिभाग के कार्यपालन अभियंता पीयुष देवांगन ह बताइस के निरदेस के पालन करत तुरते 20 मई 2026 ला तांदुला जलाशय ले पानी छोड़ना सुरु कर दिय गे हे, एकर ले तांदुला नदी म स्केप के दुवारा अऊ गुण्डरदेही वितरक शाखा नहर के जरिए घलो पानी के सप्लाय सुरु कर दिय गे हे। प्रशासन के ए तुरते फैसला अऊ जल संसाधन बिभाग के मुस्तैदी ले इलाका के मनखे मन ह खुसी जतावत प्रशासन के आभार करे हें।
हमर व्हाट्सएप चैनल ला सब्सक्राइब करव अऊ मया देवव
whatsapp – https://whatsapp.com/channel/0029VaPmGTXInlqS2WQAhw1n
youtube – https://youtube.com/@jayjohar?si=AZDI5zciOCT3Oqhw
facebook – https://www.facebook.com/share/18GsFBTgfd/
