डीकेएस म यूरोलॉजी विभाग अब हफ़्ता म तीन दिन ओपीडी

रायपुर। दाऊ कल्याण सिंह सुपर स्पेश्यलिटी अस्पताल के यूरोलॉजी विभाग म
मरीज मन ल अब हफ्ता म दू दिन के बजाए तीन दिन ओपीडी (बाह्य रोगी विभाग)
के लाभ मिलही. अस्पताल अधीक्षक डॉ. केके सहारे ह ओपीडी ल एक दिन अउ बढ़ाए
के निरनय लिस हे.

यूरोलॉजी विभाग के ओपीडी हफ्ता म दू दिन मंगलवार अउ शुक्रवार के होथे.
लेकिन अब मरीज सोमवार के घलो अपना इलाज बाह्यरोगी विभाग म करवा सकत हे.
यूरोलॉजी विभाग के विभागाध्यक्ष डॉ. सुरेश सिंह के कहिना हे, ओपीडी म
70-80 मरीज एक दिन म अपन इलाज करवाए अस्पताल पहुंचथे. जबके महीना म 50-60 मरीज विभाग म भर्ती रहिथे. अतना ही नइ हर महीना यूरोलॉजी विभाग म 30-40 सर्जरी करे जात हे.

एखर चलत मरीज मन ल सर्जरी बर 2-3 महीना के वेटिंग डेट देय बर पड़त हे.मरीज मन के इलाज म देरी ना होवय अउ इलाज म सहूलियत मिलय. एखर मद्देनजर ओपीडी ल एक दिन अउ बढ़ाए के निरनय अस्पताल प्रबंधन के ओर ले गे हे.

डीकेएस एक मात्र सासकीय अस्पताल हे जिहां लिथोट्रेप्सी के अत्याधुनिक मशीन उपलब्ध हे, जेमा बिना चीरा के 2 सेमी. तक के पथरी के इलाज करे जात हे.

एखर अलावा पथरी, रिनल ट्यूमर, ब्लैडर ट्यूमर, दूरबीन पद्धति ले ऑपरेसन करे जात हे. सासकीय अस्पताल म आयुष्मान योजना, संजीवनी योजना म घलोइलाज करे जाथे.