आज निजी अस्पताल मन म ओपीडी सेवा बंद…..सरकारी अस्पताल खुले हे बिहनिया  8 बजे ले संझा 5 बजे तक

रायपुर। छत्तीसगढ़ म लगातार डॉक्टर मन  के संग होवत दुर्व्यवहार व मारपीट जइसे घटना मन ल गंभीरता से लेवत हुए इंडियन मेडिकल एसोसिएशन (आईएमए) के आव्हान म छत्तीसगढ़ के निजी अस्पताल मन के डॉक्टर आज एक दिवसीय हड़ताल म हे। एखर चलत आज ओपीडी सेवा बंद रखे गेहे।  निजी अस्पताल मन म इलाज कराइया मरीज मन ल परेसानी के सामना करना पड़त हे।  हालांकि मरीज मन ल परेसानी न हो एला धियान म रखत हुए सरकारी अस्पताल मन के ओपीडी सेवा  आज बिहनिया  8 बजे ले संझा 5 बजे तक खुले हवय। ।

जानत हो हू के हाल ही म दुर्ग के स्पर्श अस्पताल म मरीज के परिजन मन ह डॉक्टर ले मारपीट अउ हॉस्पिटल म तोडफ़ोड़ के घटना ल अंजाम देय हे। ए घटना म अस्पताल ह तोडफ़ोड़ करइया मन के खेलाफ थाना म एफआईआर घलो दर्ज कराइस लेकिन  थोड़कन  बेर म ही उमन स बेल मिलगे।

छत्तीसगढ़ म लगातार डॉक्टर मन के संग होवत अत्याचार ल देखत हुए आईएमए ह आज निजी अस्पताल मन म ओपीडी सेवा बंद रखे के निरनय लिन हे।  आईएमए के आव्हान म आज राजधानी रायपुर संघरा  प्रदेसभर के निजी अस्पताल मन ओपीडी सेवाएं बंद रखे गेहे।  हालांकि ए हड़ताल ले इमरजेंसी सेवा  जारी रह ही।

एती निजी अस्पताल मन के हड़ताल के निरनय के मद्देनजर मरीज मन ल होवइया परेसानी ले बचे बर राज्य सरकार ह प्रदेसभर के सरकारी अस्पताल मन म ओपीडी सेवा बहिनिया  8 बजे ले संझा 5 बजे तक खुले रखे निरदेस देय हे। ए निरदेस के तहत आज सरकारी अस्पताल मन म ओपीडी सेवा संझा 5 बजे तक खुले रह ही।