मालती हत्याकांड म बार-बार एसआईटी गठन म विपक्ष ह गृहमंत्री ल घेरिस

जय जोहार रायपुर…. विधानसभा के बजट सत्र के तीसर दिन बुधवार के एक मामला म बार-बार एसआईटी के गठन करे जाने म विपक्ष ह गृहमंत्री ल घेरिस। दरअसल बलौदाबाजार जिला के भटगांव म मालती बाई हत्याकांड के मामला ल कांग्रेस विधायक चंद्रदेव राय ह सदन म उठाइस। संगेसंग गृहमंत्री ले थाना प्रभारी के शिकायत घलो करिस।

सदन म गृहमंत्री ताम्रध्वज साहू ह बताइस कि मामला के जांच बर 6 एसआईटी के गठन करे गे हे। भाजपा सदस्य मन ह आपत्ति जतावत हुए पूछिस कि एक मामला के जांच बर 6 एसआईटी गठन करे के जरूरत क्यों पड़ गिस। जनता कांग्रेस छत्तीसगढ़ के विधायक धर्मजीत सिंह ह गृहमंत्री ले जाने बर चाहिस कि 6 एसआईटी क्यों बनाए गिस। गृहमंत्री ह बताइस कि अधिकारी मन के तबादलों के वजह ले बार-बार एसआईटी बनाए गे रहिस।