24वां राष्ट्रीय वनवासी क्रीड़ा प्रतियोगिता के आयोजन, उत्तर प्रदेश के खिलाड़ी मन बिखराइन जलवा

रायपुर। छत्तीसगढ़ के राजधानी रायपुर म चलत 24वां राष्ट्रीय वनवासी क्रीड़ा प्रतियोगिता के आज समापन होइस. जेमा तीरंदाज़ी के मुकाबला म पूर्वी उत्तर प्रदेश के तीरंदाज़ मन के जलवा दिखिस। उहें कर्नाटक के बालिका तीरंदाज मन ह घलो उत्कृष्ट खेल के प्रदर्शन करिन। ए खिलाड़ी मन ह ट्रॉफी अउ मेडल के संग अपन खेल भावना अउ व्यवहार ल आयोजक मन संग जम्मो साथी खिलाड़ी मन के दिल  जीत लिस। ए दौरान पूर्वी उत्तरप्रदेश के तीरंदाज़ मन ह कुल बारह में चार पदक जीतिन हालांके पूर्वी उत्तरप्रदेश के तीरंदाज मन कोनो वर्ग म स्वर्ण पदक नई पा सकिन, लेकिन जूनियर बालक अउ सब जूनियर बालक वर्ग म ए खिलाड़ी मन ह सिल्वर अउ ब्रांज मेडल प्राप्त करिन। तीरंदाजी के जूनियर बालक वर्ग के प्रतिस्पर्धा म राजस्थान के हिमेश बरांडा ह 643 अंक प्राप्त करके स्वर्ण पदक जीतिन। उहें पूर्वी उत्तर प्रदेश के आदित्य सिंह ह 637 अंक लेके रजत अउ हीरा सिंह ह 626 अंक प्राप्त करके कांस्य पदक जितीन।

उहें सब जूनियर बालक वर्ग म उत्तरबंगाल के सकनोन लेपचा ह 664 अंक ले स्वर्ण अउ पूर्वी उत्तरप्रदेश के दीपक ह 661 अंक लेके रजत अउ इंद्रदेव कुमार ह 651 अंक प्राप्त करिन अउ ब्रांज मेडल जीतिन।

जूनियर बालिका वर्ग म उड़ीसा के मंजुलता ने 563 अंक प्राप्त करके स्वर्ण पदक म अपन कब्जा जमाइस। छतीसगढ़ के रामशिला नेताम ह 493 अंक लेके सिल्वर अउ उड़ीसा के ही मीना तीरिया ह 460 अंक प्राप्त करके कांस्य पदक जीतिन।

सब जूनियर बालिका वर्ग म कर्नाटक के बालिका मन का वर्चस्व रीहिन। कर्नाटक के भाग्यश्री ह 599 अंक के संग स्वर्ण अउ अन्नपूर्णा ह 563 अंक लेके रजत पदक जीतिन। राजस्थान के दर्शी डामोर ह ए वर्ग म 541 अंक प्राप्त करके कांस्य पदक जीतिन।

बता दन के 25 वां राष्ट्रीय वनवासी क्रीड़ा प्रतियोगिता म तीरंदाजी के 40 मीटर, 30 मीटर अउ 20 मीटर शूटिंग के मुकाबला होइस। जेमा बालक-बालिका, जूनियर-सब जूनियर वर्ग म लगभग 400 जनजातीय तीरंदाज़ मन ह हिस्सा लिन। ए तीरंदाज़ी के जम्मों मुक़ाबला राज्य आर्चरी एकेडमी के मैदान म होइस।