ग्राम माकड़ी म जनसमस्या निवारण शिविर के आयोजन

• विधायक सुश्री उसेंडी ह दीन 13 करोड़ के विकास कामन के सौगात
• शासकीय महाविद्यालय समेत 18 ठन निर्माण काम के करिन भूमिपूजन

रायपुर .कोंडागांव राज सासन के निर्देश ले जिला स्तरीय जनसमस्या निवारण शिविर के लगातार आयोजन करे जात हे, जेकर माध्यम ले सासन के अलग-अलग योजना के लाभ दुरिहा-दुरिहा के गांव तक पहुंचाय जात हे। एही कड़ी म सुकवार के कोंडागांव जिला के ग्राम माकड़ी म जनसमस्या निवारण शिविर लगाय गिस, जिहां भारी संख्या म ग्रामीण ल सासन के बड़े योजना ले लाभान्वित करे गिस। ए शिविर म मुख्य अतिथि के रूप म बस्तर विकास प्राधिकरण के उपाध्यक्ष अउ कोंडागांव विधायक लता उसेंडी उपस्थित रहिन।

विधायक सुश्री उसेंडी ह शिविर ल संबोधित करत कहिन कि छत्तीसगढ़ सरकार ह विकास के काम मन के संग-संग आम मनखे मन ल व्यक्तिगत योजना के लाभ घलो देवत हे। महिला अउ लइका मन के स्वास्थ्य बर लगातार कोसिस करे जात हे। हर गांव के चहुंमुखा विकास बर योजना बनाके काम करे जात हे। ओमन कहिन कि मुख्यमंत्री स्वस्थ बस्तर अभियान के मदद ले हमर क्षेत्र ह स्वस्थ बस्तर कोती आगू बढ़त हे, जेकर तहत अलग-अलग किसम के स्वास्थ्य जांच करे जात हे।

ओमन सबो गांव वाले ले अरजी करिन कि जब स्वास्थ्य विभाग के टीम घर-घर पहुंचय, त ओमन ल सही जानकारी देवं ताकि सबो बर स्वस्थ अउ सुरक्षित जिनगी पक्का करे जा सकय। ओमन कुपोषण अउ एनीमिया मुक्त समाज बनाय बर महिला अउ लइका मन के स्वास्थ्य म सुधार बर सबो झन ले मिलके काम करे के बात कहिन। संग म युवा मन अउ सबो नागरिक मन ले अपन स्वास्थ्य बर सचेत रहे के गोठ कहिन, ताकि एक स्वस्थ समाज बन सकय।

कलेक्टर ह कहिन कि माओवाद ले मुक्ति मिले के बाद सासन डाहर ले बस्तर क्षेत्र के पूरा विकास बर कतको योजना सुरु करे गे हे। मुख्यमंत्री स्वस्थ बस्तर अभियान ले जोर-सोर ले स्वास्थ्य जांच करे जात हे। मनखे मन के समस्या ल सुधारे बर ‘बस्तर मुन्ने अभियान’ के संग ‘सुशासन तिहार’ घलो मनाय जाही। एकर अलावा, योजना के पूरा लाभ पहुंचाय बर ‘नियद नेल्लानार 2.0’ के घलो सुरुवात करे जात हे।

विधायक ह प्री. मेट्रिक आश्रम म क्लास रूम निर्माण (लागत 19 लाख रूपिया), कन्या आश्रम म क्लास रूम निर्माण (लागत 19.39 लाख रूपिया), प्री. मे. बालक छात्रावास म क्लासरूम निर्माण (लागत 19.39 लाख रूपिया), लैब निर्माण काम (लागत 22.89 लाख रूपिया), नीति आयोग डाहर ले लाइब्रेरी निर्माण (42 लाख रूपिया), हीरावण्डी ले बालेंग तक पुल-पुलिया के संग सड़क निर्माण (लम्बाई 6.50 किलोमीटर, लागत 685.29 लाख रूपिया) अउ शासकीय महाविद्यालय माकड़ी के निर्माण (लागत 465.84 लाख रूपिया) समेत कुल 13 करोड़ 79 लाख रूपिया के 18 ठन विकास काम के भूमिपूजन करिन।

27 हितग्राही मन ल मिलीस घर के चाबी

शिविर म गांव वाले कोती ले अलग-अलग मांग अउ समस्या ल लेके कुल 57 आवेदन मिलिन। शिविर म पंचायत अउ ग्रामीण विकास विभाग कोती ले प्रधानमंत्री आवास योजना के तहत 27 हितग्राही मन के घर बन जाय के बाद ओमन ल चाबी सउपे गिस। संग म समाज कल्याण विभाग डाहर ले दिव्यांग मन ल 07 ठन छड़ी अउ 10 झन ल पेंशन के मंजूरी दीन गिस। शिक्षा विभाग ह 12 ठन जाति प्रमाण पत्र अउ गणवेश (ड्रेस) बांटीस, त श्रम विभाग ह 07 ठन श्रम कार्ड अउ खाद्य विभाग ह 46 ठन राशन कार्ड प्रदान करिन।

एकर अलावा उद्यान विभाग डाहर ले वर्मी बेड, राजस्व विभाग कोती ले किसान किताब अउ कृषि विभाग कोती ले 05 हितग्राही मन ल उड़द के बीजा बांटे गिस। महिला एवं बाल विकास विभाग ह 04 झन ल पोषण किट दीन अउ 02 झन के गोद भराई के कार्यक्रम घलो संपन्न कराइन।

पशुधन विभाग डाहर ले डेयरी योजना बर योगश्वरी प्रधान ल 70 हजार, उन्नत मादा वत्स पालन बर दीपेन्द्र साहू ल 14,625 रूपिया अउ सुपोती मरकाम ल 17,550 रूपिया के चेक दीन गिस। सुकर पालन बर मंगलु मरकाम अउ मुकेश नेताम ल 09-09 हजार रूपिया के मदद मिलीस। स्वास्थ्य विभाग ह 10 झन ल आयुष्मान कार्ड, सहकारी समिति ह 06 किसान मन ल केसीसी (KCC) लोन अउ राजस्व विभाग ह 09 किसान मन ल डिजिटल किसान किताब बांटीस।

ए मौका म पूर्व विधायक सेवकराम नेताम, दीपेश अरोरा, जनपद पंचायत अध्यक्ष जुगबती पोयाम, जिला पंचायत सदस्य रदमा बघेल अउ भगवती नेताम उपस्थित रहिन। संग म जनपद उपाध्यक्ष बैसाखु कोर्राम, जनपद सदस्य पन्नालाल नेताम, पूजा शर्मा, विरेन्द्र प्रधान, रूखमणी पोयाम, जिला पंचायत सीईओ अविनाश भोई, जनपद पंचायत सीईओ गजेंद्र धुरडे, सबो सरपंच , स्थानीय जनप्रतिनिधि अउ अलग-अलग विभाग के अधिकारी मन घलो मौजूद रहिन।